L’ùltima inchiesta di l’Insee (secondu u dispusitivu dettu Filosofi, vale à dì nant’à i rivenuti lucalizati suciali è fiscali) mostra chì i livelli di puvertà in Francia sò torna ingattiviti. In 2023, 15,4 % di a pupulazione francese campa sott’à u sògliu di puvertà, vale à dì 9,8 millioni di personi (cù menu di 1.288 àuri à u mese). Daretu à sti sciffri, ci sò famiglie chì stràzianu, ghjente chì si prìvanu di u mìnimu ch’elli abbisògnanu per campà. Certe mamme sàltanu un ripastu da pudè nutrisce i zitelli è certi zitelli anch’elli sàltanu un ripastu à u ghjornu… Durante u cullochiu di a Cuurdinazione di Lotta contr’à l’Esclusioni (CLE) di u 15 d’ottobre scorsu, testimugnanze di cinini dàvanu u crepacore. In Corsica, ci sò zitelli ch’ùn pàrtanu mai in vacanza, o ch’ùn ponu cumprassi tuttu u materiale sculare ch’elli abbisògnanu. Giuvanotte ùn ponu cumprassi serviette igièniche, zitelli torna ùn ponu studià currettamente per via ch’elli ùn anu micca càmera à elli, fendu i so duveri à mezu à i mughji è i pienti di i fratellucci o e surelluccie… Zitelli torna dèvenu occupassi di i fratelli è surelle più chjuche quandu i parenti travàglianu tardi à sera, straziendu cù dui travaglii da pudè dà di pettu à u cutidianu…
L’inchiesta dice dinù chì ssa precarità ùn si sparghje di manera uniforma nant’à u territòriu. In certi lochi, paesi o quartieri sfavurizati, ci hè di menu accessu à l’impiecu, di menu alloghju, di menu suluzioni di mubilità, di menu accessu à i servìzii pùblichi, o à i dispusitivi d’accumpagnamentu suciale. Ci hè un isulamentu geugràficu, ecunòmicu è suciale ch’impeghjurisce a situazione digià fràgile di sta ghjentarella. Hè cusì per un dettu, chì l’ìsule, fora di misure di sustegnu specìficu, sò più pòvere chì l’altre regioni chì sò vicine à i centri di e grande metrupole. Certe situazioni dinù prisèntanu di più difficultà, cum’è e famiglie monoparentale. Una nant’à trè, dice l’inchiesta, hè in situazione di puvertà (34,3 %) è ssa puvertà tocca 21,9 % di i zitelli.
In Corsica, dice l’inchiesta, u Cismonte hè frà i livelli di puvertà i più alti, superiori à a mediana francese. A metà di a pupulazione à un livellu di vita annuale inferiore à 24.200 àuri, dice l’Insee (a mediana francese essendu di 28.030 àuri). U livellu di vita di u Cismonte hè inferiore à quellu naziunale, vale à dì 21,8 %. U Pumonte va un pocu megliu cù un livellu di puvertà di 17,9 %. Frà e categurie e più tocche dinù, ci sò i senza impiecu (36,1 % di a pupulazione pòvera), e famiglie monoparentale (34,3 %) è i zitelli di menu di 18 anni (21,9 %).
Dice torna l’inchiesta chì i livelli di vita crèscenu più in fùria chì l’inflazione, fora di e famiglie e più pòvere ! Frà i fattori di sta calata, dice l’Insee, ci sò e misure di sustegnu à u putere di cumprà messe in ballu in u 2022 ch’ùn sò micca state ricundutte. 20 % di e personi e più pòvere tòccanu 8,5 % di a massa tutale di i livelli di vita contr’à 20 % di e personi e più ricche chì ne tòccanu 38,5 %. Vale à dì, l’inugualità trà più ricchi è più pòveri aumenta.
Ramentemu dinù ch’in Corsica, in 2020, l’ìsula era cunsiderata cum’è a regione a più pòvera di Francia, cù 18,3 % di a pupulazione sott’à u sògliu di puvertà (14,4 % in Francia).
L’inchiesta cunclude chì ssi risultati cunfèrmanu a necessità d’un azzione pùblica territurializata cuurdunata è à u più vicinu di e realità lucale.
È cosa hè rege di manera territurializata è cuurdunata s’ellu ùn hè micca l’autunumia ? •
