Cinque anni fà, escìa u filmu « Demain » di Cyril Dion è Melanie Laurent, « un aventura ch’hà scambiatu a mo vita » dice u realisatore, « è ch’hà datu fiatu à centinaie di millaie di personi è d’azzioni, in 30 paesi di u mondu o quasi ». Ssu filmu testimugnava di ciò ch’ellu era pussìbule di fà per luttà contr’à u riscaldimentu climàticu è tutti l’assalti contr’à a biodiversità. Ci tocca à cambià di versu è à trasfurmà i nostri modi di campà. Ùn ghjùnghjenu à piglià e bone decisioni per cambià e cose i putenti di a pianetta. Tocca à noi, citatini, di mette a manu in pasta, d’inventà e suluzioni, è d’adunìsceci per mèttele in òpera.
Oghje Cyril Dion travaglia à un antru filmu, « Animal », nant’à a debbulezza di a biodiversità è a sparizione massiva di e spezie animale. « Dapoi 40 anni, 70 % di e pupulazioni d’animali salvàtichi vertebrati anu smaritu. Avemu bisognu d’inventà un antra manera di campà nant’à a pianetta è di campà à u latu di tuttu ciò ch’hè vivu. O sinò andemu ver d’altri capatoghji, cumpresu nove pandemìe » dice Cyril Dion. Sò dui ghjuvanotti, maschju è fèmina, Bella è Vipulan, sensibilizati assai, chì vanu ind’è u filmu à risponde à ssa necessità di parà ss’estenzione di massa ma dinù chì cèrcanu di spiecà cumu cuabità cù u vivu nant’à a pianetta. U scopu hè di pudè sorte u filmu à a rientrata à tempu à a cunferenza mundiale nant’à a biodiversità in Marseglia. A crisa planetaria chè no campemu nasce di a destruzzione accelerata di i spazii di vita di e spèzie salvàtiche. Ci tocca à capisce l’inghjochi è i mecanìsimi di ciò chì ci accade, da pudè mette manu in pasta per indità un mondu novu. A sparizione di l’acelli, di l’ape è l’insetti pollinisatori, sò perìculi per l’Umanità. Luttà contr’à ssa sparizione ghjè luttà per l’avvene di l’omi. Fassi parte di u vivu per difèndelu, eccu a scumessa di « Animal ». Filosofi, ecunumisti, agricultori, militenti di a càusa di l’ambiente s’adunìscenu per testimugnà di u bisognu di risponde à tutta a cumplessità di u prublema, ma dinù per testimugnà di a forza chè l’omi è e donne raprisèntenu inseme, dènduci di rimenu per luttà contr’à a sparizione di a a biodiversità. L’omu hè capace di e peghje gattivere ma dinù di mondu bellezze è ingèniu, di sulidarità, di creatività, d’amore per inventassi un avvene più ghjustu è più bellu. « A pianetta hè in traccia di cambià » dice Bella in a banda annunziu di u filmu, « hè tempu per noi di decide di cambià, noi, è micca a pianetta ». « Demain » hè statu finanzatu cù i doni citatini è u so impattu hè statu tamantu. Cù a crisa sanitaria, certi sustegni sò stati persi è màncanu oghje 200.000 àuri per pudè pruduce u filmu « Animal ». Basta 10, 20, 30 àuri o di più sè vo pudete.
À ringraziavi d’aiutà ssu prugettu, sustenìtelu pichjendu nant’à ssu leame (www.kisskissbankbank.com) : https://bit.ly/3jvaXbc •
