« A grandezza d’una nazione è u so prugressu murale ponu esse ghjudicati da a manera ch’ella tratta l’animali » cusì parlava Gandhi è parechje persunalità di l’Umanità cù ellu. Da Pythagore chì ne fecìa l’essenza di u male umanu à Einstein chì chjamava l’omi à « liberassi di ssa prigiò » appiendu cumpassione per tutte e creature vive è pè a natura sana. « Cosa ci hè di più abbuminèvule chè di nutrìscesi di caddàveri di manera cuntìnua ? » interrugava ancu Voltaire ! È u so cumparsu, Emile Zola dicia ellu chì « u duvere u più altu di l’omu hè d’impedisce tutta crudeltà contr’à l’animali ». In tantu chì Lamartine ci spiecava « ùn avemu micca dui cori, unu per l’omi, unu per l’animali. Avemu un core o ùn ne avemu micca ». L’animali sò marturiati da l’omi, puru sò creature di sensibilità, capaci di tennerezza è d’amore, d’una fideltà senza paru ponu andà sin’à a morte pè u so patrone. Vergogna à quelli chì li fàcenu male ! Sciaccamanate à quelli chì i cùranu è sò capaci di sacrificà assai pè u so benestà. Forza à tutti ss’associi di difesa di l’animali, suvente fighjati di traversu, allora ch’elli sò più umani chè l’umani !
Frà i capatoghji oghjinchi, a Corsica ùn ghjunghje à regulà a divagazione animale. Dapoi anni è anni, quantu sò i morti nant’à strada, accidenti di vitture per via di a divagazione animale ? Quantu sò ghjente incurnate, murzicate, à le volte ancu manghjate da porchi ? Quantu sò i feriti gravi ? Quantu sò l’orti scempiati ? Cum’è chì a Corsica ùn ghjunghje à trattà ssu prublema ? Per via di ssu lascia corre, un associu hè natu pocu fà, Cambià Avà, di manera à fà piglià cuscenza chì ci vole à dassi di rimenu per truvà suluzioni. Invece di mette cù intelligenza umana a ghjente in giru à un tavulinu, i puteri pùblichi fàcenu cum’elli fàcenu dapoi sempre : tòmbanu l’animali per cacciali di a vista è calmà l’upinione pùblica ! Vergugnosa suluzione ! E suluzioni chì cunsìstenu à tumbà l’animali ùn sò suluzioni ! Chjamu quì, è vi dumandu di fà listessu cari amichi lettori, i puteri pùblichi à riflette è à mette un pocu di più sumerinu in a so azzione pùblica. E nostre sucietà muderne sò in capacità d’inventà suluzioni muderne, è micca di sbarrazzassi di i capatoghji cù a crudeltà umana.
L’associu Global Earth Keaper in Corsica hà fattu un azzione ssa dumènica nant’à a rena di Mare è Sole. Un accolta per dinunzià a vuluntà di u Statu di tumbà e vacche chì sò in divagazione nant’à piaghja di Petrusella. Da nutà chì u merre ùn hè micca favurèvule à ssa tumbera, è prupone dapoi un pezzu di sterilizà è parchighjà ssu bestiame, ma a cumuna ùn hà micca i mezi, nè finanziarii, nè ghjurìdichi, nè ammnistrativi di trattà sola u prublema. È sò cusì a maiò parte di e cumune. Per via d’ùn avè regulatu u prublema dapoi decine d’anni, ci sarebbe circà 20.000 animali detti salvàtichi in Corsica. A sola suluzione truvata da u Statu hè di fà tumbà l’animali quand’elli fàcenu troppu parlà d’elli ! Invece chì amministrativamente, ghjuridicamente, è materialmente esìstenu suluzioni ch’elli prupònenu certi associi cum’è Global Earth Keaper o cum’è Cambià Avà. Allora, ch’aspettemu per mette tutti l’attori in giru à un tavulinu ?
« Si ricunnosce u gradu di civilisazione d’un pòpulu secondu à cum’ellu tratta i so animali » dicia torna Gandhi. Era à u sèculu passatu. Ch’avemu fattu dapoi per sorte di l’arcaìsimu ? •
