Arte Mare

le 09/10/2024

U scopu di l’associu Arte Mare hè di prumove a creazione in Mediterràniu è di favurizà i scàmbii trà e culture cù l’arte, a literatura è u sinemà. Urganizeghja cusì parechji evenimenti. U festivale di u filmu di donne, Cine Donne di veranu, chì valurizeghja e donne rialisatrice. È u festivale Arte Mare di u filmu mediterràniu, d’auturnu.

À longu à l’annata, urganizeghja dinù pruiezzioni è dibàttiti, cum’è l’annu fattu pocu fà cù u filmu di Pierre Barnerias, Les Survivantes di lugliu scorsu à u Régent in Bastia, chì parla di e maltrattenze contr’à e donne, o cù u filmu di Muriel Cravatte, Mothership u 23 di sittembre sempre à u Régent, filmu nant’à l’azzioni di succorsi in mare di l’associu SOS Méditerranée.

Arte Mare mette dinù à l’onore u libru, cù Scontri literarii di maghju tucchendu u grande Bastia sin’à a Casinca in partenariatu cù a Biblioteca patrimuniale Tommaso Prelà, è e mediateche di Bastia è di a Castagniccia Mare è Monti.

U scopu hè di sustene è di prumove a lettura. Ci sò dinù Scontri literrarii di sittembre in tutta a Corsica in partenariatu cù e biblioteche di l’ìsula. Infine, ci hè u premiu Ulysse, creatu in u 2001 per ricumpensà òpere di scrivani di u Mediterràniu, durante u festivale di u filmu mediterràniu.

U festivale di u filmu mediterràniu hè presidatu da Michèle Corrotti. Hè u più anzianu festivale di Corsica, creatu in u 1982, più di 40 anni ! Tutti l’anni, durante una decina di ghjorni, i Corsi ponu àpresi à e culture sinematografiche di Mare Nostrum. A prugrammazione hè temàtica è s’apre à a literatura, a gastrunumìa, a mùsica è l’arte in generale di u Mediterràniu.

À tempu, ci sò cumpetizioni per ricumpensà i longhi metragi, u filmu corsu, e scole di u sinemà. Si scopre filmi è à tempu culture è paesi di u mare chì ci lea à tutti. U pùblicu apprezieghja assai sti scàmbii, a gastrunumìa cù sceffi stellati, e mostre da tutte mamme, i dibàttiti, e serate in mùsica, tuttu u cumbugliu ch’accumpagna e scuperte sinematografiche.

Quist’annu u festivale si tene da u 27 di sittembre à u 12 d’ottobre 2024.

Di nuvembre, da u 20 à u 24, si tene dinù à u Spaziu Carlu Rocchi di Biguglia, Camerà Pulìtica chì tratta di a pulìtica in u sinemà.

Cine Donne mette à l’onore rialisatrice nant’à ciò ch’ella porghje a donna à a sucietà, u so sguardu, è dinù a so sorte, i so guai, i so diritti. Una manera di luttà contr’à e discriminazioni. Ssu festivale hè statu creatu trè anni fà cù u sustegnu di a Cumunità d’agglumerazione bastiaccia ma franca dinù u territoriu di Bastia per spàrghjesi sin’à in Marana è ancu in Balagna è u suttanacciu.

In grazia à associ cum’è Arte Mare a Corsica, è spessu Bastia, sò cità di rinomu culturale induve si pàssanu assai evenimenti, scàmbii, dibàttiti, cunferenze, chì fàcenu cresce e cuscenze è e sulidarità. In u stessu tempu, rialisatori, attori, tècnichi, musichenti, scrivani, intervenanti da tutte e mamme scòprenu a Corsica è a so cultura. Un bellu testimognu di a richezza è a bellezza di u Mediterràniu ! Longa vita à Arte Mare ! •