Chì natura strana hè l’omu. Capace di i dui antagonìsimi, à tempu Hobbes chì dicìa ch’ellu era « un lupu per l’omu » è Spinoza chì li rispundìa « l’omu hè un Dìu per l’omu »… Capace di sparghje u bè cum’è u male. Capace di dà a so vita per l’altru, è à tempu d’arrubala cù spietezza. Capace di scrive è mette in ballu cunvenzioni di i diritti per l’omu, a donna, u cinninu, l’animali… è à tempu di rìdesine, d’annientale, di sputali nantu…
Chì pensà di stu mondu à l’orlu di st’annu novu ? Guerre, viulenze immonde, torture, offese e più porche à l’innucenza, vigliaccherìe, ingurdizia di putenza, mufrachjine, destruzzioni, macelli, è soldu, soldu, soldu… Ogni ghjornu porghje u so contu di disgrazia nant’à e catene d’infurmazioni di fronte à i nostri cerbelli lobotomizati chì s’abbituèghjanu è e s’ingòllenu abbambanati à longu à settimane, mesi è annate… À tempu u prugressu umanu ripara cori, ricustruisce bracci è gambe, scopre medicina per curà e peghje malatie, inventa mondu mare è maraviglia per creà, custruisce, sparte… propulsa l’umanità in u spaziu à mezu à stele sempre più luntane, esciendu ancu di a galassìa, brama di stallassi nant’à a luna o ancu marzu, và à scopre l’abissi in capsule chì ci màndanu fiure sempre più chjare è strane… si mostra capace di a più pura bellezza, ind’è l’arte è a creazione, in a mùsica, a pittura, a scultura, è di i sentimenti umani i più nòbili è schieti… è à tempu si mette in quatru per custruisce arme sempre più suffisticate in l’arte di tumbà è di fà soffre, mette in ballu un arsenale nucleariu prontu à fà saltà a pianetta parechje volte è a pienghje ogni volta ch’ella accade un disastru eculògicu… cura i so figlioli cum’è un tesoru di vita è imagineghja puppatule di zitelle da sazià e pervesità e più malsane, aiuta u disgraziatu è lascia more zitelli in mare mezu à tempurale è squali nant’à battellacci di furtuna, s’impegna à prò di a ghjentarella è a scruccuneghja senza vergogna… L’omu hè capace d’apre a porta è à tempu di chjòdela… capace di curà cù pazienza una pìccula sumenta sin’à purtalla à pruduce frutta cù una felicità tamanta è di strughje fureste sane cù tutta a so biodiversità in piante o animali… Chì paradossu… Ghjunghjeremu un ghjornu à una civilisazione di più sàvvia è umana ?
Aspettendu, cosa ci appronta 2026 ghjustapuntu in stu mondu di disòrdini ? È chì risuluzioni simu capaci noi di tene da ch’ellu sìa un pocu di più bellu stu mondu ? Bramu eiu chè no àppiimu core è spìritu un pocu di più militente in l’Umanità. Da sparghje di più fraternità in giru à noi è in ssu paese di Corsica chè no tenimu puru caru tutti quant’è no simu. Chè no sàppiimu difende ssa terra, a so natura, a so biodiversità, a so purezza, a friscura di l’acque muntagnole, a dulcezza di e sponde marine, u prufume di a machja, u preziosu di a nostra lingua è di a nostra cultura tramandate da tempi landani, a forza di i nostri sapè fà di ss’agricultura chì conta una stòria d’amore trà l’omu è a so terra, è a bellezza di a so ghjente cù tutte e so generosità.
Saraghju cusì besgia ? Dumanderaghju troppu ?
O ghjente Pace è Salute è bon’annata à tutti ! Tenite caru i vostri è tenite caru a Corsica. •
