Eccu francatu un antr’annu ! Cù ellu, a prim’annata di i naziunalisti à e rispunsabilità territuriale. È digià, un bilanciu ci hè ! Tremindui, i nostri presidenti anu mandatu l’auguri à u so pòpulu cù un sapore particulare. Una dimensione di rispunsabilità è di maturità. Un timbru à tempu grave, di pettu à i guai di stu mondu. À tempu bramosu, di pettu à l’àvviu patriottu. «L’annu 2016 hè statu torna frasturnatu assai pè issu Mondu. Ùn hè stata priservata l’Auropa è a Corsica ùn hè à l’agrottu di parechji penseri » hà dettu u presidente di l’Assemblea di Còrsica, Ghjuvan’Guidu Talamoni. «Avete sceltu di permette à u nostru paese d’ammaistrà u so avvene è di participà à u mondu à a so manera. Avete sceltu di permette à a nostra cultura è à i nostri valori di sprìmesi cun forza è serenità. Ogni ghjornu a ci dite. Ogni ghjornu ci ramintemu u nostru ghjuramentu. Durante un annu, avemu travagliatu senza trigà à a custruzzione di un avvene sulidariu è appaciatu… Eccu u nostru scopu : permette à ogni Corsu di campà megliu nant’à a nostra terra » dice torna u presidente di l’Assemblea.
«Hè statu u 2016, in lu mondu sanu, un annu di strage è di dulore. Un annu oscuratu, in core pròpiu à a Francia è à l’Auropa, da u spiombu di u tarrurìsimu. Sta sera, pinsemu à e vìttime di Berlinu, di Nizza, di Brussele. È furmemu l’auguru chì, per ogni cuntinente, l’inghjustizie è e disugualità làchinu a piazza à sucetà sulidàrie è fraterne » hà dettu in quant’à ellu u presidente di u Cunsigliu Esecutivu, Gilliu Simeoni, aghjustendu cum’una scumessa da rilevà inseme : «Per l’annu chì vene, a nostra determinazione ferma tamanta per ghjunghje à avè i mezi di pruduce è di sparte e richezze, à ammaistrà u sviluppu di a Còrsica, à favore di tutti i Corsi. » Trasparenza in i soldi pùblichi, arristati Miot, trasporti marìttimi, ricunniscenza di a muntagna, autonomìa energètica, lotta contr’à a precarità, sustegnu à l’imprese, statutu fiscale, lingua corsa, aiutu à l’agricultori, difesa di a furesta, rumènzule, Cullettività Ùnica, rilazioni internaziunali eccèttera… u guvernu naziunale dà di pettu à tutte e scumesse ! «Per l’annu chì vene, a nostra determinazione ferma tamanta per ghjunghje à avè i mezi di pruduce è di sparte e richezze, à ammaistrà u sviluppu di a Corsica, à favore di tutti i Corsi » hà dettu torna u presidente Talamoni, augurènduci : « chì l’annu novu sia quellu di un’ecunumia più forte, di a ghjustizia suciale, di a demucrazia ! », lampendu per compie, un «Campate felici ! » cum’elli fecìanu l’antichi.
« Inseme, avemu datu pettu à e dificultà… Inseme, avemu principiatu à porghje suluzioni à prublemi impussìbbuli da scioglie, dapoi decine è decine d’anni… Hè bella certa ch’ellu ferma da fà più chè l’assai. Ebbeh, ancu què u faremu ! » hà lampatu cum’una sfida Gilliu Simeoni, ramentendu ch’ella hè « scogliu sodu » a Còrsica induve sempre ind’è a stòria « trionfi u spìritu di risistenza, di tullarenza è di libertà ». Cusì, Gilliu Simeoni ci manda cum’un invitu « andate puru, sta sera a cunfidenza a purtemu in senu, chì u pòpulu corsu face a prova, ogni ghjornu è in ogni duminiu, di a so vulintà d’esse. L’annu vechju stà per andàssine. Affacca l’annu novu. Chì 2017 sia quellu di a divizia, di a spartera, di a fratellanza. Chì a Corsica è u so pòpulu s’avviinu nant’à a strada di a dimucrazia, di l’emancipazione è di a Pace. » È cusì sìa ! À tutti, o amichi lettori, Pace è Salute è Sulidarità !
Fabiana Giovannini.
