Hè u più grande, u più assassinu, u più tremendu di i campi di a morte è di a suluzione finale messa in ballu da i nazì. Stu 27 di ghjennaghju hè statu cummemuratu l’80u anniversariu di a scuperta di u campu d’Auschwitz Birkenau. Ci sò morti più d’un millione di ghjudei nant’à i sei millioni morti di a shoah, ma dinù pulunesi, rumani, rùssii, è tutte e « razze inferiore » cum’elli dicìanu i nazì. Ci sò morti dinù resistenti, comunisti, omossessuali, andicappati… « e porte di l’infernu sò aperte » testimugnava di maghju 1945 u ghjurnalista americanu John Berkeley. U mondu hà scupertu cusì ciò ch’ella hè a stirpera di massa. I primi ghjorni, i media ùn ci crèdenu è pochi sò quelli chì rèndenu contu di e prime scuperte di lugliu 44. Eppò, americani, suvietichi, brittànichi testimunièghjanu… entrendu pocu à pocu in Lublin-Maidanek, Natzweiler-Struthof, Auschwitz, Ohrdruf, Buchenwald, Nordhasen, Dora, Gardelegen, Bergen-Belsen, Dachau, Mathausen, Ravensbrück… più di 42.000 ghettos è campi nazì anu sparsu l’orrore assuluta. Custruiti da u 1933 à u 1945, ci sò morti 15 à 20 millioni di personi, secondu à un inchieste cundutte da 2000 à 2013. I circatori cuntinuèghjanu à studià sti tempi di spaventu, è cuntabilizèghjanu oghje 1150 ghettos ghjudei, 30.000 campi di travagliu furzatu, 980 campi di cuncentrazione, 1000 campi di prigiuneri di guerra, millaie d’usine d’armamenti, 500 sciaccapaglie induve e donne èranu schiave sessuali, millaie di lochi chjamati « centri di cura » induve e donne incinte èranu aburdite di forza è dinù lochi di sperienze medicale induv’elli èranu torturati a corcia ghjente. A parulla d’olocostu ùn hè sprupusitata. È ùn avemu ancu finitu di splurà tuttu ciò ch’ellu hè capace di fà l’omu à l’omu. Si cunnosce l’orrore di a destruzzione « industrializata » contr’à i ghjudei, ma sò numarosi torna à esse morti in d’altre circustanze dice u prufessore di a Sorbone, Rainer Hudemann : « averemu da scopre d’altre persecuzioni cù d’altri sciffri. Venimu di scopre campi di a gestapò in Allemagna, forse d’altri esistìanu dinù in Francia… »
D’aprile 1945, Eisenhower tene una cunferenza di stampa in Ohrdruf. « Si dice chì u suldatu americanu ùn sà micca perchè si batte. Oghje a saperà » dice u generale americanu, urganizendu vìsite di ghjurnalisti è di parlementarii. E fottò è i filmi si spàrghjenu in u mondu chì scopre forni, putrioni, fosse cumune, salme ammansate, barache puzzicose, muntagne di scarpi, di vestiti, di capelli ricuperati, di ghjuvelli, di denti in oru, è ssi corpi inascarati, ochji stralunati, sguardu spentu per avè vissutu u peghju di l’umanità… Parechji, disgraziosamente, anu da more torna i ghjorni è e settimane dopu à a so liberazione… I suldati chì liberèghjanu i campi sò marcati per sempre. Certi diventeranu ancu scemi…
Auschwitz ferma u campu u più pèssimu di i campi nazì. Creatu in u 1940 per Auschwitz, 1941 per Auschwitz Birkenau, è 1942 per Auschwitz III (Buna), 44 altri campi sò stati custruiti à l’ingiru, face chì Auschwitz fecìa parechje centinaie d’èttari. Quandu i Soviètichi s’avvicinàvanu di a Pologna, i SS cèrcanu à viutà i campi. Decine di millaie di prigiuneri sò furzati à spiazzassi versu l’Ueste, marchjendu senza beie nè manghjà, mezi spugliati nu u freddu è a fatica parechje decine di chilòmetri ind’è sta « marchja di a morte ». Quelli ch’ùn pudìanu più marchjà èranu tombi da i SS. Sin’à l’ùltima seconda di a guerra, i nazì anu sterminatu è assassinatu. È certi vulerìanu falla finita cù u duvere di memoria ? •
