Prete Mondoloni si n’hè andatu à l’età di 79 anni. Cù ellu, hè tutt’un èpica chì sfila ind’è nostre mente. Ùn era un prete cum’è l’altri è a so vita testimugneghja di quella scuzzulente di u pòpulu corsu à longu à i 50 anni scorsi. Pochi a sanu, ma hè statu legiunariu Ghjuvan’Claudiu Mondoloni, « un sèmplice peccatore », cum’ellu dicìa, chì hà trovu a strada di Cristu dopu à una ghjuventù tumultuosa. Natu à u Libanu, figliolu di militare, cresce sott’à u rimore di e bombe. A famiglia volta in Corsica in u 47, ind’è u babbone ch’hà marcatu a so vita in Pitrettu Bichisgià. Eppò e mutazioni di u babbu militare u pòrtanu quindi è culandi.
Ghjuvanottu, entre in Saint-Cyr ! Ma ùn stà in piazza è raghjunghje l’OAS.
Chjìbba ! Hè arrestatu armatu cù uni pochi d’amichi è hè impreggiunatu durante à parechji anni di preventiva.
Per cacciassi a zerga, si mette à a boxe in priggiò. È e cazzuttate di prete Mondoloni èranu cunnisciute ! Hè cundannatu à 15 anni ma graziatu sùbitu dopu. Puru ghjè in priggiò ch’ellu scontra à Dìu è decide di fassi curatu.
Parte in Spagna pò in Bèlgica à fà i so studii. 15 anni dopu, diventa prete passatu a quarantina, ma un prete «micca cum’è l’altri » l’avemu detta. Da cazzuttate à gattivu caràtteru, i so cumpagni di u seminariu u chjàmanu Cassius Clay, u nome d’un Campione di Boxe cunnisciutu, è l’episcupatu ùn sà cumu fà cun ellu… Volta in Corsica infine in u 1981, mandatu in a ghjesgia di Ponte Novu, curatu di a parochja di Ponte à a Leccia. Un antra vita chì principia, à accupassi di a ghjente di a so parochja, di a so terra di Corsica ch’ellu tenìa tantu caru, di a rinàscita di u ricordu di Ponte Novu cù d’altri cum’è Nunziu Grisoni ch’ellu hà ritruvatu in celu ssu 2 di nuvembre.
Era una persunalità strana Ghjuvan’ Claudiu Mondoloni, sempre in bullore, purtendu rangers sott’à a suttana. Diventa un militente naziunalista accanitu, aderente à l’ANC. « A morte di Ghjesù hè stata d’una certa manera pulìtica. Ùna aghju nisun cumplessu à pruvà di porghje una certa riflessione in u mondu pulìticu » dicìa per spiecassi u sgiò curatu. In u 1987, hè arrestatu durante azzuffi à a venuta di Pasqua, allora ministru di l’interiore. Ma ùn accetta micca l’assassiniu di Robert Sozzi, è piglia rinculu durante l’affruntamentu trà naziunalisti ind’è l’annate 90, « iè à a rivendicazione, iè a Corsica nazione, ma micca à n’importa chì prezzu » dicìa prete Mondoloni. È tutt’ognunu hà in mente e so prèdiche muralisatrice l’8 di maghju in Ponte Novu, induv’ellu s’impunìa di parlà corsu cù un accentu stracciatu. « Parlate corsu in casa di Cristu » dicìa prete Mondoloni !
Era cusì u sgiò curà, à tempu un pacchettu di nerbi, à tempu d’una grande generosità. Invechjendu, s’hè fattu ancu sàvviu induv’omu andava à circà cunsiglii. Suldatu, curatu o militente, tutta a so vita hè statu un cumbattente, prete Mondoloni. «Ci vole à difende ssa terra, terra nostra » dicìa pocu fà in un intervista à a televisiò.
Arritti pensa à i soi, i so fratelli, i so nipoti, è à a so ghjesa viota in Ponte Novu. U s’hà purtatu a malatìa, ma a so morte era cum’un ùltima manifestazione, cù centinaie di personi à accumpanalu sin’à u Campu Santu di Merusaglia, cù mondu preti à purtà a so salma. U so passu decisu è l’ombra di a so suttana firmeranu per sempre à u nostru latu, accumpagnendu e nostre lotte. Avèdeci o sgiò curà. Riposi in pace.
ARRITTI.
