Cuntinuemu a nosta rubrica da cuntà i tesori di a nostra lingua à traversu l’Antulugìa di e spressioni corse di Farrandu Ettori. Sse spressioni ci impàranu assai nant’à a nostra stòria è ciò chè no simu. Omu si deve di tramandale.
Quessa a spressione hè sempre abbastanza usitata. Farrandu Ettori ci impara ch’ella hè una spressione genuvese. Secondu à a Giustificazione, documentu patriotticu di u XVIIIu sèculu, vale à dì sò i resti chì fermanu di u baccalà siccatu, dunque di gattiva qualità, ch’era speditu in Corsica da Gènova cù a ticchetta Baccalà per Corsica.
A spressione hè firmata sin’à oghje è ferma impiecata ogni volta chì i Corsi pènsanu esse vìttime d’una discriminazione pèssima. •
