Bake Bibea, caminu di pace, hè un muvimentu civile natu in principiu di l’annate 2010 in Paese Bascu per custruisce a pace. Un evenimentu forte hè statu u scontru di Aiete in 2011. Tandu, u muvimentu abertzale (patriottu bascu) chjama à a pace. Trè ghjorni dopu, ETA annunzia ch’ella pianta definitivamente l’azzione armata è dice « hè tempu d’agisce cù curagiu è risponsabilità ». Èranu presenti in Aiete testimogni per aiutali à francà u passu. Kofi Annan, secretariu generale di e Nazioni Unite, Gerry Adams, presidente di u Sinn Fein, premiu Nobel di a pace irlandese, Bertie Ahern, anzianu primu ministru irlandese, Pierre Joxe, anzianu primu ministru francese, Gro Harlem Brundtland, anziana prima ministra norvegiana, Jonathan Powel, anzianu capu di u cabinetu di Tony Blair di a Reame Unitu… « Simu quì oghje in Paese Bascu perchè credimu ch’ellu hè ora è tempu di falla finita cù l’ùltimu cunflittu armatu in Auropa » dice a dichjarazione di Aiete. « Ci vole curagiu, vuluntà di piglià rìsichi, ingagiamentu tutale, generosità è savviezza. A pace accade quand’u putere di a ricunciliazione piglia u passu nant’à l’odiu stabilitu, quandu u putenziale di u presente è di l’avvene piglia u passu nant’à l’amarezza di u passatu ». L’invitu era lampatu à ETA di fà una dichjarazione pùblica per piantà a lotta armata, à i guverni spagnolu è francese d’apre u diàlogu, è à tutte e bone vuluntà d’incuragisce è aiutà ssu prucessu ingagiatu di manera irreversìbile. U 15 di dicembre di u 2012, u primu Forum di a pace hè urganizatu in Baiona. Pò tutti l’anni sin’à oghje. Ci hè vulsutu dinù mondu manifestazioni, cù millaie di personi à sfilà à favore di u disarmu è di u regulamentu di a quistioni di i prigiuneri, decine di catene umane, di blucchimi è azzioni da tutte e mamme da impegnà u pòpulu dinù ind’è ssu prucessu di pace. Ci vole à ricunnosce u curagiu è l’annegazione di i nostri fratelli baschi per ghjùnghjeci, malgratu a repressione. Stu 9 di marzu, 11 militenti èranu ghjudicati in tribunale per avè bluccatu l’autostrada chjinèndusi à longu à a strada. Sò stati cundannati… ma senza pena ! Una manera di ricunnosce chì a raggiò era soia… Di ferraghju scorsu s’amparava chì u nostru amicu Jean Noël Etcheverry, dettu Txex (da prununzià Cecce) era rinviatu in Tribunale currezziunale da a Precura Naziunale Anti Terrorista. Per vìa d’un azzione cundutta 7 anni fà in Luhuso (Louhossoa). L’azzione avìa permessu à u prucessu di pace di fà un avvanzata maiò. U 16 di dicembre 2016, Txetx, militente pacifista, cù quatru altre personi, avìa partecipatu à un operazione simbòlica di disarmu d’ETA. Di ss’azzione, hè natu u cullettivu l’Artisgiani di a pace. È, quatru mesi dopu, l’8 d’aprile di u 2017, ETA urganizava u so disarmu. A pace, ùn basta micca à dilla. Ci vole à regulà u prublema di i prigiuneri, l’avvicinamentu, pò a liberazione, u prublema dinù di l’amende è e persecuzioni chì cuntinuèghjanu compia a detenzione. U prublema dinù di e vìttime, da parte è manca. Quelle di l’attentati, è quelle marturiate da un Statu chì pratica a tortura. Ci vole à regulà dinù u capatoghju di l’avvene à custruisce da chì tutt’ugnunu possi ricunnòscesi ind’è a suluzione messa in ballu. In tutti i cunflitti per fà chì l’uni è l’altri pòssinu parlassi, ci vòlenu artisgiani di pace. Sò elli ch’indìtanu u caminu di pace da chì i prutagunisti pòssinu custruìscela. Txetx hè unu di quessi, perseguitatu di manera inghjusta. Teni forte o fratelllu. •
