Unu di l’intìtuli di u novu discu di Patrizia Gattacecca hè una strinta d’ochju, una chjama d’amore lampata à a Catalogna : Basgiu di Barcelona… Patrizia, donna di u Meditteràniu, impastata di cultura è passione di mare nostrum ci rigala torna un invitu à u viaghju, u sognu, u bellu, ma dinù a scuperta, u scambiu, a spartera… Da Bastia à Nàpuli è Barcelona, sin’à in Buenos Aires, Ghjerusaleme, Istanbul o a Medinà… a terra, i canti, i maghi, u focu, l’azurru, e notte d’oriente… u viaghju hè bellu !
Sò cusì 13 canti magnìfichi intiti di a puesìa è l’affettu di Patrizia pè a natura umana, pè u mischiu di e culture, per l’intricciate identitarie.
A voce di Patrizia Gattacecca hè una carezza ch’ella vole porghje à l’ànime, per sveglie pianamentu e cuscenze à i so messagi. E meludìe accumpàgnanu cusi bè e parulle nutrite da i sogni è l’affanni di l’artista, in i territorii secreti di ciò chì face u so ingaggiamentu, à tempu arradicata in a so terra di Corsica, impastata da a nostra lingua è a nostra cultura, à mezu à u Mediterràniu, sin’à tuccà l’universale da e so brame è e so prumesse, scuperta d’altre culture, lingue, lotte.
« A Catalunya quì vole sfidà l’avvene
E piazze sì di ventu è l’idee è di sogni
Tinte d’oru è di sangue appese à i balconi
E bandere sò spere.
Si cunfòndenu in tè a notte cù u ghjornu
Per inventà a luce è inghjotte si u tempu
Si tàcenu venice è vola a to voce
È vanu mille passi à tesse ti a fola
Basgiu di Barcelona
Cum’è u sole chì mai vole ciuttà
Ballu in Barcelona
Nantu à a mossa offerta di e ramblas.
U cerchi u to silenziu in l’oghji di e donne
Memoria di pittori di fede è di pazzìa
S’àlzanu cum’è tempii in celu l’utopìe
Un puema impetratu ricamu mai compiu
Ceramica d’azurru marosu
Càncani di ghitare estrose
Alloppiu di sirene in u vinu è u cantu
Da Fenice sì morta è rinata più bella
Barcelona a stella
Basgiu di Barcelona
Cum’è u sole chì mai vole ciuttà
Ballu in Barcelona »
Anu partecipatu à ssu dischettu novu chjamatu « Terra nostra », Ghjàcumu Thiers, Ghjuvan’Bernardu Rongiconi, Laurent Vernerey, Loïc Pontieux, Dumènicu Degli Esposti… Patrizia Gattacecca serà cù noi issu 23 di maghju in Bastia, à a sala pulivalente di Lupinu per lampà u so «Basgiu di Barcelona » è sparte cù noi stesse speranze per ssu pòpulu è ssa cultura magnìfica catalana
