Alain Nebbia, u nostru amicu è militante, merre di u paese di Lòpigna in Crùzini-Cinarca, hè statu gravamente feritu da un cignale cappiatu à mezu à l’abitazioni in Aiacciu. Surtendu di a so vittura, hè statu lampatu in tarra è murzicatu. Hè statu uspitalizzatu in gattivu statu !
Dapoi annate, a pupulazione di e nostre cità pate di a prisenza di ruchjate d’animali salvatichi chì invadìscinu u spaziu urbanu. Ci sò stati digià gravi accidenti cum’è quellu chì hà feritu Marilina Taddei in Bastia, attaccata da una vacca.
Ma ùn c’hè nulla chì avanza. Quantu ci sarà bisogna di casi sìmili nanzu chì una pulìtica di sicurisazione di sti lochi sìa messa in òpera rialmente ?
In verità, ùn si pò adimette ch’un tal accidente pudessi accade. Dumane sarà un zitellu a vìttima, o una parsona anziana surtendu cu u so cane, è certi puderìanu ancu perde a vita.
Ssu lascià corre deve compie. Ùn pò più durà.
Assicuremu Alain di a nostra sulidarità, è spiremu oramai una riazzione forte di i puteri pùblichi. •
