SC Bastia
60 punti, 17 vittorie, 52 buts cù un differenziale di +7, Bastia finisce à una bella quarta piazza a so stagione di ghjocu à pallò di pettu à e cinque prime squadre ch’anu fattu un grossu campiunatu anch’elle ! U suspense hè statu fin’à l’ùltimu scontru, cù un Sporting chì finisce in forma per raportu à u so principiu di stagione ; allora chì l’ambizione era solu di mantènesi, pudìa forse pratende di più ! A seconda parte di u campiunatu dopu à a tregua di a cuppa di mondu di ghjocu à pallò hè stata una bella rièscita è di sicuru i turchini ponu avè qualchi rigrettu nant’à certi macci persi di manera imbecilla… Infine chì i sustenitori aspèttanu già a pròssima stagione da sapè qual’hè chì ferma, qual’hè chì parte, qual’hè chì ghjunghje di i ghjucatori, per avè un pocu di più ambizioni nant’à a cullata in Lega 1. Si sà chì puru senza troppu bugettu u Sporting hè spurtivamente in capacità di scuzzulà parechje squadre sustenute da a Lega è a Federazione di futbollu francese, è dunque di ghjucà frà i primi di a fiura di u ghjocu à pallò ! L’ànima di stu club li permette di fà sunnià u pòpulu turchinu, basta à purtà a maglietta è da i ghjucatori à u coach, sò pronti à superassi per cuntinuà sta bellìssima storia chì dura dapoi 118 anni ! U Sporting hè numinatu à i trufei Sport & Management cù dui club di Lega 1 (Nizza è Marseille) chì ricumpensa un funziunamentu nuvatore. Si spieca cù l’uriginalità di a so Sucietà cuuperativa d’interessu cullettivu (SCIC) è l’urganisazione dinù di i so sustenitori in Socios. U coach Regis Brouard hè frà i cinque migliori intrenori di Lega 2, è un di i ghjucatori, Kevin Van den Kherkoff finisce in a squadra-tippa di Lega 2 !
Ci tocca à aghjustà e prudezze di a so squadra riserva, campione di Regiunale 1, chì colla in Naziunale 3, è u bellu mantenimentu in Naziunale di l’U17 (9u) è l’U19 (7u). Ancu l’U18 (secondu) è l’U16 (terzu) còmpienu una bella stagione di Regiunale. Vale à dì quantu l’Accademìa di u Sporting appronta belle riserve pè a so squadra prima !
Forza Bastia !
AC Aiacciu
26 punti, 26 disfatte nant’à 38 scontri, solu 7 vittorie, l’ACA finisce 18u nant’à i 20 di a classìfica di Lega 1 è ùn ghjunghje à mantènesi. Un campiunatu catastroficu per l’Aiaccini ch’avìanu fattu una cusì bella stagione annu in Lega 2 (secondu cù 75 punti) ! Puru finìscenu cù una bella vittoria contr’à l’OM chì li hè piuttostu riesciutu postu ch’elli anu vintu dinù u macciu andà à u Velodrome. Da nutà chì Auxerre, cullata in Lega 1 annu scorsu, si ne rifala in fùria in Lega 2 anch’ella, postu chì sò quattru e squadre à ùn pudè mantènesi quist’annu. Ghjè dì quant’ellu hè diffìciule di ghjucà in Lega 1 senza un bugettu tremendu à u livellu di u business ch’hè diventatu u ghjocu à pallò. Quellu di u campione di Lega 1, Parigi, hè 30 volta di più impurtante chì quellu d’Aiacciu cù i so magri 22 millioni d’àuri… À l’ùltima stagione l’ACA avìa fattu u so ritornu in Lega 1 in grazia à a so difesa, cù solu 19 buts incasciati, invece chì quist’annu ghjustamente, u più grossu fiascu di l’ACA hè a so difesa, 18a di a classìfica è 74 but incasciati. Parechji artisgiani di a cullata (Krasso, Courtet, Laçi…) partuti, a squadra aiaccina ùn hà pussutu disgraziosamente mèttesi à livellu di a fiura di u futbollu francese cù u bugettu u più chjucu di Lega 1.
Ritruveremu cusì i derby trà Aiaccini è Bastiacci sta pròssima stagione ! •
