Quantu ci lascerà doli è suffrenze ssa malamorte di u Covid19? Ogni ghjornu, u bilanciu hè tremendu. S’aghjùstanu i morti è i malati, l’uspidali sò tracarchi, i servizii di rianimazione colmi.
Ufficialmente, ssu marti 8 d’aprile, 40 morti in Corsica per 356 malati, 10.869 morti in Francia per 82.048 malati, 88.000 morti in u mondu per 1,5 M di malati… Ssi sciffri ùn ghjòvanu tantu cum’è bilanciu, chì u tempu di scrìveli, sò digià francati… ma danu a dimensione tremenda di a catastrofa mundiale chè no campemu. È ancu ! Tutt’ugnunu s’accorge oghje à dì ch’elli sò largamente sottustimati. Si sà chì a China ùn hà dettu a verità nant’à i so morti. Hè stata centinaie di volta più numarosi a corcia ghjente ghjunta à ricuperà i vasetti funerarii di i soi, chì i sciffri dati da u guvernu chinese… Si sà dinù chè in Italia o in Spagna, e statìstiche date nant’à i morti di ssa malatitaccia, sò anch’elli largamente sottustimati. In Francia, i morti in e case di ritirati è quelli morti in casa soia, ùn sò stati cuntabilizati à longu à duie settimane. Secondu l’Insee, ci volerebbe forse duppià a statìstica ufficiale. Fendu u paragone trà i morti di marzu 2019 è quelli di marzu 2020 a murtalità di a pupulazione di fatti hà più chè duppiata, è si stàccanu e duie lìnee statìstiche à tempu ch’ella nasce l’epidemìa… Si face u stessu custatu in tutti i dipartimenti i più tocchi da l’epidemìa.
A Francia ùn testa micca sistematicamente i so malati. Ghjente ch’anu tutti i segni di a malatìa ùn sò micca cuntabilizati, ancu quandu i so duttori li dìcenu « ghjè u Covid19 »… vale à dì chì quand’elli mòrenu in casa, o ind’è l’Ehpad, per l’autorità, ùn sò morti da u Covid ! U ghjurnale lemediatv.fr raporta u testimogniu d’una sucetà funerale in Francia : « hè chjara chì certi casi di Covid19 ùn sò micca dichjarati. I pigliemu in càrica ind’è l’Ehpad o in casa. Per un dettu simu andati pocu fà ind’un Ehpad à circà un mortu. A famiglia ci dice ch’ellu hè un casu di Covid19 perch’è anu fattu u test. Ma ùn era micca dichjarata nant’à u certificatu di morte ». Ancu sè dapoi u 3 d’aprile, i sciffri ufficiale ch’ellu dà u prufessore Salomon aghjùstanu i morti di l’Ehpad, u bilanciu ferma sempre sottustimatu d’appressu à i custati di sopramurtalità fatti da l’Insee trà 2019 è 2020.
È ancu, l’analisi di Le Media ùn hè cumpleta, postu ch’ellu hà studiatu i dipartimenti induve a murtalità hè impurtante in scriffru. Puru, in certi regione, cum’è in Corsica per un dettu, pare pocu una murtalità di 40 personi, ma per raportu à a pupulazione hè impurtante assai. Parechji dipartimenti francesi ùn sò pigliati in contu. Si cunnoscerà dunque a vera murtalità è u veru impattu di ssa malamorte più tardi. U fattu si stà chì i sciffri dati da u prufessore Salomon sò assai sottustimati, ci volerebbe à multiplicali omancu per dui. Un veru spaventu.
È una bugìa di più.
Fabiana Giovannini
