Cari amichi lettori, vulemu oghje fà una strinta d’ochju à u nostru amicu Andria Brignole, per disgrazia sparitu qualchi annu fà. Pueta d’Ulmeta di Tuda, era un sustegnu fidu d’Arritti, è ci hà scrittu tante è tante puesìe ! Da quassù, simu sicuri ch’ellu serà cuntentu di vede e so rime torna à accumpagnaci. Cù ellu, ùn ci scurdemu di tutti quelli ch’anu cuntatu per Arritti è si sò dati di rimenu da ch’ellu campi u nostru settimanale. Ch’elli ripòsinu in pace. Bon’annata à tutti, amichi lettori !
Bon dì bon Annu, bon Capu d’Annu !
Pace è Salute à tutt’annu
Chì l’amore ci possi dà
Pace è Salute è benestà.
Pace è Salute à noi Corsi
Sìanu intesi sti discorsi
È fà chì le nostre macagne
Làscinu piazza à e cuccagne
Pòssinu andà manu in la manu
Versu una nuvella funtana
È pudè beie à vuluntà
L’acqua di a serenità.
Pace è Salute à tutti quanti
Tantu i vechji chè i fanti
Pòssimu passà tuttu l’annu
Senza cunnosce novu affannu
È uniti cum’è fratelli
Pudè spalancà i purtelli
À chì averà vuluntà
Di precacci u benestà.
Pace è Salute à cori ardenti
Scrittori pueti è cantenti
Chì sanu dicci cun manera
Di purtà rispettu à sta terra
Sìamu Corsi omi di core
È sapè sparte u nostru amore
Cun quelli disposti à cantà
Evviva a felicità !
Bon dì bon’annu, bon Capu d’Annu !
Pace è Salute à tutt’annu
Chì l’amore tracci a vìa
Pace è Salute è cusì sìa ! •
