500gendarmi, cinque squadroni di gendarmi mubili, sò stati mubilizati per caccià da a furesta di Bure… una quindecina di militenti contr’à u nucleariu.
Umbeh ! Tamanta operazione ! I militenti s’èranu aggruttati nant’à capane sposte à 20 metri d’altura nant’à l’àrburi… Tutte e strade sò state bluccate da a pulizza, i 221 èttari di u situ sò stati quadrittati è un elicòtteru circava à truvà induv’elli si piattàvanu i corci militenti disarmati è fendu fronte à un freddu tremendu… Popopo poooo ! Pò esse fiera ssa manata d’omi è di donne citatini ad avè cusì imbambulitu à cinquèsima putenza mundiale ! «Simu quì per ch’ellu ùn s’impuzzichisce micca a notra Terra mamma, èramu nant’à vechji querci ch’anu campatu bellu più vechji chè noi » anu dettu quelli chì si fàcenu chjamà «i ciocci di u boscu di Lejuc »… ghjè dì quant’ella era periculosa ssa brava ghjente è quant’ellu era urgente di stirpala di u situ ! È per ghjustificà tuttu stu parapiglia è tene, u ministru di l’internu hà twittatu « fèmula finita cù e zone di non drittu » ! O pòvera Repùblica ! Dinunzia u cullettivu «Bure Stop» : « a vìsita di Sebastien Lecornu, secretariu di Statu à u ministru di a Transizione eculògica era prevista oghje per scuntracci.
U guvernu dice ch’ellu vole a cuncertazione è ci manda i gendarmi. Simu stumacati ! ». A prupietà di u Boscu Lejuc, è dunque di i lavori previsti nantu, hè cuntestata à u Tribunale da u cullettivu. L’agenzia naziunale pè a gestione di i mulizzi radiuattivi (Andra) ci vole stallà i so fuculaghji d’aerazione di u prugettu dettu Cigeo. Ghjè un centru di depòsitu di lozzi nuclearii, à 500 metri sottuterra. Mulizzi ultraradiuattivi, i più pèssimi ch’omu pò truvà, à vita longa è sicurità incerta ! L’Andra vole pruvà perfurature per mette à u puntu a so dumanda di depòsitu sottuterratu. I militenti pròvanu à oppònesi per impedisce u principiu di i lavori previsti di 2019, ch’anu da durà un pezzu è custà 25 milliardi d’àuri ! I depòsiti sottuterra ùn anu marchjatu indocu in u mondu. Solu dui siti esìstenu in altrò, è ci sò stati incidenti gravi è dunque suspensione di i prugrammi. Ci vole quantunque à esse scemi per piattà sottu terra mulizzi ch’anu una durata di vita è di dannu di 100000 anni ! Qual’hè chì pò dì ciò chì s’hà da passà da quì à 100000 anni ? Sè ssi lochi ùn seranu micca scurdati da l’omi à longu à i sèculi, po dassi custruiti, o scuzzulati da terramoti, o annegati sott’à stese d’acqua sutterànie ?
Cumu assicurassi d’una sicurità pè e generazioni à vene, s’omu ci caccia da sott’à l’ochji ciò chì si deve curà di manera quasi cutidiana ?
«Vulteremu » anu prumessu i militenti. Curagiu è forza à elli !
Fabiana Giovannini.
