Più di 2100 zitelli èranu imprigiunati in i campi di retenzione in Francia in 2020. Più di 1700 personi sò morte (è quantu mai ritruvate ?) nant’à e strade di u so eldorado, bramendu di truvà cundizioni migliori di vita. Secondu à a Cimade, più di 400.000 personi sò mantenute senza carta da l’amministrazione francese è dèvenu sbrugliassi à campà senza ricunniscenza. Stà senza carta hè una situazione invivèvule, ùn si pò truvà un alloghju cum’ellu si deve, per via ch’ùn si pò avè pigione. Ùn si pò truvà travagliu, o allora micca dichjaratu, omu hè sfruttatu, senza altru drittu chè di travaglià più chè di ragione tucchendu una paca di miseria. Omu ùn si pò curà quand’ellu hè malatu, è campa cù a paura in corpu da a matina à a sera. A paura di u cuntrollu, di l’arrestazione o a denunziazione. Pè e donne marturiate da u so maritu o u so cumpagnu, ùn ci hè mezu di purtà lagnanza. Hè una doppia pena…. U senza carta hè un disgraziatu senza drittu.
Frà i 27 annigati di Calais, una prima salma hè stata identificata. Si chjamava Maryam, avia 24 anni è era curda d’Irak. Maryam avia lasciatu i so parenti perchè vulia ritruvà u so fidanzatu in Londra. Li vulia fà una surpresa. Ma quandu u canottu s’hè tufunatu sott’à u pesu di e 32 personi chì avìanu imbarcatu, hà cumunicatu cù u so prumessu nant’à Snapchat. Pruvendu à rassicuralu, hà fattu nice chì u guvernu venia à u so succorsu. Invece innò. S’hè morta a corcia Maryam à mezu à u mare, senza avè pussutu stringhje un ùltima volta in i so bracci u so fidanzatu. « Era pròpiu generosa » dice a so amica. Avia pruvatu già duie volta di passà in Inghilterra, còntanu i so parenti. Ma ùn ci hè ghjunta. Solu duie personi nant’à i 32 imbarcati sò stati ritruvati vivi, un irachianu è un sumalianu. Vale à dì chì trè fèrmanu sempre smariti postu chì 27 salme sò state ritruvate. Sette donne, diciacette omi è trè zitelli. Frà elli una famiglia di 10 personi, tutti morti. Daretu à i sciffri è e statìstiche, ci sò vite, stòrie, surisi, brame. Myriam era ghjunta prima in Allemagna, pò era passata in Francia, sperendu pudè raghjunghje l’Ingilterra è maritassi culandi. Quantu vite è speranze sciolte !
U presidente di a repùblica francese è u primu ministru inglese si sò aduniti da pudè discute cum’elli pudìanu megliu chjode e fruntiere è scumbatte contr’à e traversate murtale. Puru u drama ùn hà micca scuragitu. Sta dumenicata, torna 250 personi sò state succorse. I kayaks sò stati ritirati di a vèndita à Decathlon… Secondu a Fundazione Abbé Pierre, 172.000 personi sò state spulsate di i campi di Calais è Grande-Synthe trà nuvembre 2020 è ottobre 2021. Tendoni strappati, robba strutta, a ghjente hè scacciata di manera viulente di ssi lochi di furtuna. Fastidiati, assidiati, ghjunti à l’orlu di e so speranze, nigati è spulsati quì, righjitatti culandi, ùn anu più chè una suluzione, quella di traversà u mare, pocu impreme u prezzu è e cundizioni di securità. Bràmanu di ghjunghje infine à u tèrmine di u so viaghju per custruìscesi una vita nova. Un inchiesta parlementaria dice chi a Francia hè culpèvule « d’una maltrattanza di Statu » contr’à i migranti. Dapoi l’11 d’ottobre, dui migranti sò in greva di a fame per dinunzià a so sorte è dumandà chì u guvernu pianti i smantellimenti di i campi.
L’affare pare senza sboccu. •
