Hè esciutu à l’Edizioni Scudo, u libracciolu « Canti è Puesìe » di Etienne Perfetti. Un QR còdice permette d’andà nant’à a piattaforma internet chì sparghje cusì una trentina di canti, arrigistrati à i Studios Ricordu d’Antone Leonardi.
Autore, cumpusitore, interpreta, Stèfanu Perfetti hè un omu carcu di sensibilità. Hè membre di u gruppu Diana di l’Alba dapoi a so nàscita, è di u gruppu ch’ella hà creatu, Quassù. Naziunalista hè statu elettu in Furiani, ma più chè pulìticu, ferma nanzu tuttu un militente di a cultura corsa.
Hà cumpostu ancu a mùsica di ssi canti pruposti, fora di qualchi unu, Ma perchè tiratu d’una meludìa irlandese, U cantu di i Paulisti tiratu d’un tradiziunale napulitanu, À tutte quelle spiratu di Georges Brassens (Les passantes), A cumuna di Jean Roger Caussimon è Note maga d’una mùsica scritta da Antone Marielli.
A puesìa di Stèfanu Perfetti, spieca u libracciolu, « hè una puesìa sèmplice, chì corre facilmente è tocca u core. Hè una puesìa muntagnola, fresca è nustrale, cù vucàbili è parulle accessìbile à tutti perch’è dedicate à a mùsica è à u cantu. Hè luntana d’una puesìa intellettuale, ‘mùsica nanzu tuttu’, dicìa Verlaine ». A so puesìa, a so mùsica sò carche à emuzioni è dulcezza è si lèghjenu o s’ascòltanu cù gran’piacè.
Una puesìa sèmplice, chì corre facilmente è tocca u core.
Da Quassù chì canta u caminu, u scopu da tuccà, l’amore chì tutt’ognunu brama, à a Note Maga di i nostri imaginarii, Gira, di u tempu è a vita chì fùghjenu, Lucia, umagiu à a donna, mamma o figliola, Per Stella, dedicata à a so figliulina, L’Arte di l’Amore, altre umagiu à l’amore, cum’è In l’ochji di la moi cara, Candida Mama, Primu Amore, Venere, À libru apertu, U veru amore, In casa mea, l’Amore, A Madonna di A Villanova, Per tè, Rusalina, o torna, parlendu di a partanza cruda, cù Ma perchè… si capisce chì l’amore di a donna hè a musa di ssu pueta. Ma l’amore dinù di l’amichi, cù Sciaccamana, l’umagiu à u so gruppu Diana di l’Alba, o à u paese, cù Montestremu, Terra Dea, Strada Santa. A stòria spira dinù u pueta, cù A Cumuna, Machu Pichu, Anarchìa, per un mondu più bellu, o l’umagiu à U Babbu, Luce Pasquale Paoli. Un amore è un attaccammentu dedicatu dinù à u so cane cù U Lamentu di Timpesta. È l’oda à a vita è a fùria chì ci porta, Ventu, Vite, Pizzichella nustrale, o quella di a pusesìa cù Musa Mea. Sò tutte òpere belle da scopre è da sente cù piacè cumprendu « Canti è Puesìe » ! •
Quassù
Stu paese di cucagna ch’ellu era a to ghjuventù
Oramai un l’abbia in brama, è finitu ùn torna più
Spapersu in questu mondu in cerca d’ogni virtù
Piglia è attepa le cunfine a verità hè quassù
Quassù si pesa l’altagna è lu muvrone dinù
Si discioglie ogni pena è l’amore ùn more più
L’acqua di a funtanella core trà mezu à li foi
Ne pasce la pecurella senza tèmene li boi
Quì si scopre l’orizone l’altu mare è l’aldilà
Quì si marchja ad alte fronte è timore omu ùn nè hà
Quì si àprenu le porte per quellu chì sà pichjà
Nun si teme malamorte quì tutte hè umanità
Quì si spunta u primu albore à l’oriente quallà
Quì si sbuccia u primu fiore di a libertà
Cun la luce è cun lu sole sempre per l’eternità
Ci stà l’ànticu maestru cun l’ochju di a verità. •
