Thierry Ottaviani hè bè cunnisciutu pè i so studii tale La Corse des écrivains, La Corse poche pour les nuls o Nietzsche et la Corse. Ed èccuti ch’ellu esce u so primu rumanzu : Chien de sang.
Eccu a storia : Simu à tempu d’oghje, in Còrsica, è l’autore sceglie di principià in medias res, cioè traspurtà sùbitu u lettore in l’azzione, quì una « nuit bleue ». I parsunaghji principali sò Dominique o Dumè, Orso è Marie Do. Dumè ùn hà micca fattu studii è vole mantene l’attentati da ottene l’autunumia, a libertà di i prighjuneri corsi o l’impòsitu rivuluziunariu. Orso hè stitutore, li piace u so travagliu, s’intaressa à a filusufia. Marie Do hè avucata, è a so clientella hè cumposta sopratuttu da naziunalisti. Orso si lascia cunvince da u so amicacciu Dumè è da Marie Do, chì Orso hè innamuratu in veru : scriverà i stampini di rivindicazione, prima d’entre ind’u scagnu pulìticu di Le Parti de la liberté, latu « legale » di l’urganisazione. Sempre prunzichendu à Orso, a ghjuvanotta ottene ch’ellu pigliessi a parolla à l’Università d’estate di u Partitu. Hè un successu, è Orso piglia baldanza. Quandu accade chì Dumè hè statu arrestatu, Marie Do ottene chì Orso diventa u neguziatore cù u Statu francese.
Ma u fattu si stà chì Marie Do, liberatu ch’ellu hè Dumè, mette à frequentallu torna, è micca Orso ; una lèttera anònima cù i ritratti di st’unione, mette u ghjuvanottu in zerga. Si vole vindicà. Da quessa, cerca da ottene putere di più. Riesce à mette Dumè da cantu, è cuntinueghja à neguzià cù a Francia. Dumè decide dunque di ripiglià l’azzione militare da impedisce Orso d’ottene una riforma di l’istituzioni corsi. Da truvà soldi, pattighjeghja cù a mafia. Ma s’hà da passà male è, à a pur’fine, i trè eroi anu da fà a malamorte.
Malgratu e so qualità, u racontu hè appena sèmplice è i parsunaghji, à parè nostru, màncanu di fundezza, à le volte ind’a discrizzione fìsica è ind’a manera dèbbule ch’elli pènsanu long’à u rumanzu. Qualsìasi e so imperfezzione, u libru si leghje ind’una meza ghjurnata, è t’hà a scusa d’esse un primu rumanzu. Di fatti, hà scrittu parechji « essais » l’autore, ma l’arte rumanesca hè bella chè sfarente. Aspittemu dunque u sicondu rumanzu di T. Ottaviani da vede u valore di u scrittore. Ma, dendu un’uchjata à tutti i sò scritti, pudemu pinsà ch’ellu amparerà in furia à culmà e mancanze di stu libru.
Marina Chovin.
