A lege climà di u guvernu hè sempre in discussione à l’Assemblea naziunale, è à tempu ch’elli sò ricusati l’amendamenti da migliurà sta lege, i scientìfichi di l’Agenzia Internaziunale di l’Energia infòrmanu chì malgratu a pandemìa ch’hà frinatu l’ecunumìa, l’emissioni di CO2 sò in crèscita da 2019 à 2020. L’AIE tema una crèscita ancu di più forte in 2021. L’adunita di i raprisententi d’una quarantina di paesi màrcuri scorsu s’hè impenserita d’una pussìbule ripresa ecunòmica disprezzendu i sregulamenti climàtichi. Eppuru, basta à mette in ballu une poche di misure à favore di l’energìe rinuvelèvule per parà un « avvene appucalipticu » hà dettu u presidente di ssa riunione di capizzoni, Alok Sharma. « Appucaliptica » : a parulla hè tremende, è di sèntela in bocca à ssi paesi frà i più pulluenti di a pianetta ch’ùn anu nisun voglia di frinà e so ecunumìe, face ancu di più paura. Da a China à i Stati Uniti, passendu da l’Unione aurupea, u Giappone, l’Ìndia, u Brasiliu, l’Indunesìa, tutti a dìcenu : « sè no fighjemu l’indiatura, da veru andemu versu una crèscita di più di 4 gradi di riscaldimentu, bellu luntanu di i 2 gradi chì a cumunità internaziunale s’era datu cum’è scopu », hà dettu John Kerry, u raprisentente di Joe Biden, presidente di i Stati Uniti d’Amèrica ! I Stati Uniti ch’avìanu abandunatu l’Accordi di Parigi nant’à u climà dopu à l’elezzione di Donald Trump. Dapoi Joe Biden prova à richjappà u ritardu irrispunsèvule di ssi 4 anni. Ci vole à esce « di e belle parulle » hà dettu John Kerry, « ùn sarà micca u stessu pianu per tutti, ma femu ugnunu ciò chì ci vole ». Ssa quarantina di paesi chì raprisèntanu 70 % di l’emissioni mundiale prumèttanu d’agisce per ghjnghje à a neutralità carbona da quì à 30 anni, 40 pè a China. Umbeh !… I quaranta anni scorsi, malgratu l’alarme da tutte e mamme, u mondu ùn hè ghjuntu à tene e so prumesse, allora… omu pò imprimurìscesi di l’avvene ! Vistu cumu a Francia tratta u prublema in casa soia, sapemu digià ch’ella ùn ghjucherà un rolu mutore ind’è ss’obbiettivu… 80 paesi anu quantunque già prisentatu scopi novi per riduce e so emissioni di gasu à effettu di serra. Frà i quali l’Unione aurupea è u Reame Unitu. In Francia, sapemu già ch’ellu serà un pianu ch’ùn ci permette micca di cuntene l’emissioni. È in altrò, quantu sò cù a vuluntà di tene i so ingaggiamenti ? In più si sà chì a Russìa ùn vole seguità ssi scopi, in quantu à i paesi di u Golfu ùn fàcenu mancu parte di sse riunioni di i capizzoni di a pianetta.
In 2015, l’Accordi di Parigi s’èranu ingaggiati nant’à parechje misure frà e quale mantene a timperatura mediana di a pianetta à 2 gradi per raportu à i tempi preindustriali è cuntene a crèscita à 1,5 gradu da pudè ci ghjunghje… I scopi, i finanziamenti, i cuntrolli, i sforzi da spàrtesi, l’ingagiamenti presi ùn sò tenuti. Ci hè di chè ingattivìscesi u sangue ! Dapoi a pandemìa di a Covid19, milliardi di dòllari sò stati spesi per cuntene a cuntaminazione è prutege e pupulazioni cundannate à stàssine in casa di pettu à una malatìa ch’hà fattu 2 millioni è mezu di morti… allora chè di pettu à i ciambuttamenti climàtichi ci vole aspettassi à centinaie di millioni di morti, è, forse, a fin’di l’Umanità… qual’hè chì ci capisce ? •
