Cumu serà chì si spaventa u mondu cù stu coronavirus ? L’influenza (a grippa in corsu d’oghjeghjornu) face di più morti è s’addatta à u vaghjolu ch’ellu ci vole à migliurà ogni annu… dinù, sò di più murtali a dipendenza à l’alcool o à a droga, o l’accidenti di vitture… o e mine antipersunale, veru scempiu, ancu in tempu di pace… Puru, u mondu sanu hè in bullore per vìa di ssu baciliu scunnisciutu, virulente è cuntagiosu assai, chì s’hè sparsu in quattru è quattru ottu in China… In mancu trè settimane, 1100 morti, 43.000 personi cuntaminate, millioni di personi in quarantena, centinaie d’altre rimpatriate in u so paese d’urìgine… chjìbba, saetta ! Anderà sin’à induve ssa malamorte ?
Un omu s’era impenseritu nanzu à l’altri, identifichendu sùbitu u baciliu cum’un perìculu mundiale, assumiglièndulu à u SRAS, chjamendu l’autorità chinese à mèttelu sott’à surveglianza è a ghjente à prutègesi… U duttore Li Wenliang hà alarmatu à tutti u 30 di dicembre 2019. S’hè mortu un mese è qualchi ghjornu dopu, u 7 di ferraghju. Era statu cuntaminatu curendu a ghjente… Puru ùn era nè circatore, nè specialista di l’influenza, solu oftalmologu. Avìa curatu 7 malati chì travagliàvanu nant’à u marcatu di l’animali di Wuhan, a cità a più cuntaminata. N’avìa parlatu cù una manata d’amichi duttore è, tutti, sò stati arrestati da a pulizza u primu di ghjennaghju scorsu. L’autorità chinese li anu rimpruveratu di sparghje gattive è false nutizie, è li anu dumandatu di ricunnosce ch’elli s’èranu sbagliati : « site for’di lege. Dite bugìe nant’à Internet. Vi tocca à cullaburà è piantà s’azzioni illegale. Vi dumandemu di calmavi è di riflette, attenti, sè vo cuntinuate cusì, sè vo ùn cambiate micca di versu, sè vo cuntinuate e vostre attività illegale, sarete perseguitati da a lege ! » 10 ghjorni dopu, Li Wenliang casca malatu è hè uspitalizatu u 12 di ghjennaghju. A stòria li hà datu ragiò più in furia chè previstu : in pochi ghjornu a crisa diventa internaziunale. U Tribunale ricunnosce u 28 di ghjennaghju chì l’ottu personi ch’avìanu alarmatu a pupulazione di dicembre scorsu, avìanu a ragiò. « Sarebbe statu una bona sè u pùblicu avìa intesu u messagiu, purtatu maschi, pigliatu misure per prutègesi, evitatu i marcati d’animali salvàtichi di Wuhan »…
« Ci anu vistu chjaru nanzu à ch’ella schiatti l’epidemìa.
A verità hè più impurtante chè a ghjustizia »
dice oghje u capimachja di l’epidemiologisti di u Centru chinese…
A morte di Li Wenliang hà cummossu assai a pupulazione chì dumanda più d’umanità à i burocrati di u partitu cumunista.
Laca un urfanellu di cinque anni u duttore Li Wenliang è una moglie incinta, dinù cuntaminata, cum’è i parenti di Li. Una famiglia sana culpita in core.
Fabiana Giovannini.
