L’autore di sta publicazione ci dà u so parè in quant’à a situazione ecunòmica di a Còrsica. Fendu òpara di pedagogia, ci ripete ogni tantu, à a manera d’un mantra, a stessa frasa : « la qualité plutôt que la quantité » (pàgine 19, 27, 34, ecc.). Alora, perchè ch’ùn circaraghju micca eiu à fammi pedagoga ? Di fatti, si trova in stu libru un isbagliu abituale per ciò chì tocca à a parolla Kallistè. Certa, hè greca a parolla, ma : « I Grechi ùn anu mai chjamatu a Còrsica Kallistè. »
Principia u librettu fendu u paragone trà u Qatar è a Còrsica, i primi sò diventati ricconi per via di u so petroliu, tocca à noi di rende ricca a Còrsica per via di e so risorze naturale : ci vole à scambia l’andatura oghjinca di u turìsimu. A suluzione à stu prublema chì rinasce torna eppò torna à u fà di l’estate (a cusì detta «Saison ») è chì porghje poch’è micca roba à i Corsi, ci vole, prima, à fà pagà l’accessu à a nostra natura chì ghjè a nostra ricchezza spùtica. Dopu, ci vole chì i soldi frusteri sìanu spartuti frà tutti i Corsi, ciò chì permetteria d’arricchisce l’abitanti è micca solu i sopramercati, ma dinù di fà nasce impieghi novi. Ma « I Grechi ùn anu mai chjamatu a Còrsica Kallistè. »
Astre misure à prò di l’ecunumia di l’ìsula : sviluppà a cultura è impignassi ind’a difesa di u nostru patrimoniu. Ci tocc’à sminuisce i camping, chì a ghjente hè disargentata, asgisce per l’ambiente : fà cresce l’elettricità chì vene da l’energie pulite, pruduce a robba cara : u turistu ricercatu hè quellu chì t’hà i soldi è più a robba hè cara, più li pare di gode di a soia a furtuna è di valè megliu chè « les gens qui ne sont rien. » Da fà vene sti turristi, hè necessariu di fà cresce l’osterie cinque stelle. Ma « I Grechi ùn anu mai chjamatu a Còrsica Kallistè. »
Ci vole dinù chì u turistu possi schià a matina è fà u surf u dopu meziornu. Charles Colonna sviluppa astri punti di primura, tale l’acqua, u mullizzu, a piazza di l’Università, i trasporti, ecc. Ma a situazione oghjinca, cù u so turìsimu ch’ùn face micca campà un paese, t’hà per risponsèvule a Francia. A Francia cù e so legge pèssime, cù e so duie guerre mundiale chì t’anu, in qualchi annu, stirpatu una generazione sana di giuvanotti, rimpiazata da omi è donne chì cèrcanu piazze date da cunniscenze è ch’ùn dipèndenu micca di e so qualìfiche. Prega l’autore : « discitàtevi, fèmula finita cù e decisione, e crìtiche, è l’inghjulie di a Francia.
Aiò ch’hè ora è chì, sè nò ùn ci spicciemu micca sarà troppu tardi ! » Ma « I Grechi ùn anu mai chjamatu a Còrsica Kallistè. »
Mariana Chovin.
