Scola Corsa, a sapete, hè l’associu chì prumove l’insignamentu immersivu in lingua corsa. Hè un assuciazione trà militenti di terrenu, eletti municipali pronti à accoglie a scola in a so cumuna, parenti bramosi di vede i so figlioli imparà a nostra lingua è a diventà i bislingui ch’abbisogna a sucietà corsa per mantenne viva sta lingua, insignanti è aiute materne chì fàcenu a scelta prufessiunale di sustene u prugettu di riacquistu di a lingua corsa è zitellucci intusiasti di ritruvassi ogni ghjornu in classa per imparà !
Dapoi quatr’anni, Scola Corsa multiplicheghja ogni annu e scrizzioni è alza u livellu da appruntà sta leva chì dumane si sparghjerà ind’è l’imprese, i cumerci, e scole, l’amministrazioni, l’associ, i club spurtivi, i lochi di cultura, in ogni locu induv’ellu hè pussìbule per fà di a Corsica una sucietà bislingua.
Scola Corsa hà bisognu di soldi per campà. Malgratu l’ubligazione di a lege, u Statu ùn dà ancu a pussibilità di cuntrattualizà cù ellu è dunque hè sempre Scola Corsa chì deve pacà i so insignanti. Quattru siti (Bastia, Biguglia, Corti, Sàrrula Carcupinu) esìstenu oghje per 150 zitelli. Più seranu aiutati, è più Scola Corsa puderà apre altre scole per accoglie sempre più zitelli. Ùn ci hè pìcculu donu, u pocu face l’assai, allora, aiutate a nostra lingua à campà, sustenite à Scola Corsa !
Sàbbatu u 9 di nuvembre, u Spaziu Carlu Rocchi in Biguglia accoglie una serata di sustegnu. Da ringrazià l’artisti chì canteranu per Scola Corsa ! Sìate numarosi à sciaccamanali ! •
U prugramma
Prima parte, à 5 ore di sera : Dibàttitu.
« E dinàmiche linguìstiche in l’àmbii sculare è sucetale »
À partesi da 7 ore : Apperitivu è paghjelle.
Ci serà da beie è da manghjà à a caffetterìa di u Spaziu à prò di Scola Corsa.
Siconda parte, à 8 ore è mezu : Cuncertu cù parechji gruppi.
Eppò, Patrizia Gattaceca, I Pignotti, Francine Massiani, Elisa Tramoni, Romain Dominici et Michè Dominici.
À truvacci cù piacè per sta stonda di spartera ! •
