Scola Corsa appronta a so terza annata è l’apertura di u Corsu Preparatoriu à a pròssima rientrata ! A dimarchja nata in 2020 cresce ogni annu, accugliendu sempre più zitelli, allarghèndusi à i so parenti chì s’impègnanu ind’è a marchja di e scole, furmendu dinù maestri è aiute materne, è fendu cresce cù tutta sta dinàmica a lingua corsa !
Oghje, Scola Corsa, sò trè scole in Bastia, Biguglia è Sàrula Carcupinu, 63 zitelli, 12 impiegati (maestre, aiute materne è amministrativi). Scola Corsa hè sociu di u retale Eskolim d’insignamentu immersivu assuciativu in lingua regiunale chì conta più di 15.000 allevi in tutta a Francia, da a Brittagna à u Paese Bascu, a Catalogna, l’Alsazia è l’Occitanìa.
Cusì, Scola Corsa hà u so pròpiu modu di furmazione cù cunvenzioni cù l’Afpa è l’Università di Corsica è brama d’apre d’altre scole à a pròssima rientrata in Cismonte è Pumonte s’ellu hè pussìbule. Da una vintina di zitelli in 2020, passerà u retale à più d’un centu annu chì vene !
Per quessa, bisognu hà di truvà sustegnu, aspettendu di pudè funziunà di manera più securizata cù a cuntrattualisazione cù u Statu ch’hè di drittu è hè rivendicatu da l’associu.
Arritti chjama i so lettori à sustene Scola Corsa.
Serà l’uccasione per voi stu vènari 21 d’aprile in Bastia cù u sustegnu di l’aurodeputtatu Francescu Alfonsi. U Spaziu l’Alb’oru vi invita à una cunferenza à 5 ore dopu meziornu sott’à a presidenza di Ghjiseppu Turchini, cù Paul Molac, deputatu à l’Assemblea naziunale di u gruppu Liot, autore di a Lege Molac à favore di e lingue regiunale, Peio Jorajuria, presidente di a Federazione di e scole immersive basche Seaska, è Jean-Louis Blenet, presidente di l’Istitutu Superiore di e Lingue di a Repùblica Francese (ISLRF), dinù vicipresidente di e scole immersive occitane Calendreta.
Si puderà dibatte cù l’invitati è i rispunsèvuli di l’associu di l’interessu di l’insignamentu immersivu per fà cresce a lingua corsa.
In sèguita à u dibàttitu, ci serà una serata di sustegnu cù i gruppi Felì, Balagna è Diana di l’Alba à pàrtesi di 9 ore di sera. Ci serà pocu biglietti in vèndita sopr’à piazza, pigliate dunque e vostre entrate in lìnea nant’à a lea : http://bit.ly/cuncertu_scolacorsa
Sìate numarosi à sustene a nostra lingua cù Scola Corsa ! •
Per piglià e vostre piazze : http://bit.ly/cuncertu_scolacorsa
