Si chjamava Alex Pretti. Avìa 37 anni, era infirmieru. Curava a ghjente. È pè u più i suldati veterani. Cù dulcezza, calore umanu, curava. Hè mortu pruvendu torna di curà, di prutege una donna ch’ellu ùn cunniscìa micca di u gasu ch’ella sprizzava l’ICE, sta pulizza trumpista incaricata di sbarrazzà MAGA di i migranti. Alex era americanu. Hè statu tichjatu di colpi da pulizzeri armati di gasu, matràcculi è pistolle. Li brusgiava l’ochji è i pulmoni stu gasu, ma cuntinuava di mèttesi trà mezu à l’ICE è a corcia migrante chì i pulizzeri mulestàvanu. Hè cascatu, i ghjinochji in terra, u capu chjinatu, ùn era ne vendicativu, ne minacciante, ma sottumessu in ssa stonda à a scimità di st’omi colmi di putere è d’orgogliu. È si n’hè truvatu unu per caccià a so pistolla è tumbalu senza pietà. Hè statu toccu da una palla in capu, pò dui, pò trè, una decine di palle l’anu matraversatu. S’hè mortu nant’à l’astracu di ssu carrughju di Mineapolis ssu 24 di ghjennaghju. È oghje, i so assassini pròvanu à imbruttìscelu. A prima reazzione di Trump nant’à i so retali hè stata di dinunzià « un terrurista domèsticu hà pruvatu d’assassinà pulizzeri federali »… Hà dettu dinù u rispunsèvule di l’ICE, Gregory Bovino, « e vìttime sò l’agenti di a patruglia fruntaliera »…
U 7 di ghjennaghju, ghjè un antra americana, una donna Renée Good ch’hè stata assassinata in a so vittura di parechje palle da i pulizzeri di l’ICE. Hà dettu Trump, « Renée Good hà viulamente è di manera salvàtica rimbarsciatu l’agente di l’ICE »… è pè a secretaria à a securità interiore : « ghjè un attu di terrurìsimu interiore »… Renée Good avìa 37 anni è trè figlioli di 6, 12 è 15 anni oghje urfanelli di mamma. Era osservatrice pacifista di l’operazioni di l’ICE per dinunziale…
Per l’unu è per l’altra, i testimogni, e fottò, e videò mòstranu ch’elli sò elli e vìttime di ssa pulizzaccia terrurista ! È serà di più in più pèssima sin’tantu ch’ella hè prutetta, incuragita, glurificata da Trump, u so guvernu è i so retali.
Trè settimane dopu à l’assassinamentu di Renée Good, nisun inchiesta ùn hè stata aperta. Nisun sèguita ghjudiziaria contr’à l’omu chì l’hà tumbata senza ragione.
Millaie è millaie di manifestanti anu sfilatu per dinunzià i mèttodi di l’ICE, esecuzioni summarie, zitellucci arrestati da pudè chjappà i so parenti, vechjetti manittati è strascinati mezu spugliati ind’è a neve è e timperature tremende. L’artisti è e persunalità di tutte e mamme fàcenu sente a so voce. Ma pè u più, sò l’abitanti di Mineapolis, cità reputata pè u fraiutu è a sulidarità suciale, chì ricuncilièghjanu cù a natura umana. S’urganizèghjanu, communichjèghjanu nant’à i retali ogni volta ch’elli impàranu ch’unu hà da esse arrestatu, Si mubilizèghjanu per impedisce l’arrestazione. È situazioni di guerra civile ùn sò tantu luntanu dinù, cù certi chì s’àrmanu è vòlenu impedisce anch’elli l’arrestazioni arbitrarie, ma cù a forza sta volta… Si sfonda l’Amèrica…
« Oghje ci arricurdemu chì a libertà ùn hè gràtisi. Ci vole à travaglià per ottènela » dicìa Alex Pretti in 2024 in umagiu à Terrance Lee Randolph, un veteranu di 77 anni mortu à l’ospidale di l’anziani cumbattenti induv’ellu u curava…
L’ICE ùn hà micca tiratu nant’à un omu, hà tiratu nant’à un omu ch’avìa fattu di l’attu di curà è di prutege à l’altri u so mistieru, a so vucazione, una filusufìa di vita. Alex (cum’è Renée) era un eroe cum’è i veterani ch’ellu curava. •
