Nant’à l’esempiu di i nostri amichi baschi, catalani o brittoni, a Corsica piglia l’iniziativa anch’ella d’una grande manifestazione chì si vulerà appuntamentu annuale pè a nostra lingua. U Cullittivu Parlemu Corsu ci invita à a Currilingua, u 4 di lugliu ! U scopu hè di corre per raccoglie soldi è dinamìsimu è sustene prugetti pè a lingua corsa. Spartimu allegrìa è piacè in giru à a nostra lingua ! Evviva Currilingua ! Evviva Parlemu Corsu !
Eccu à u so presidente, Micheli Leccia, chì ci spieca u scopu è u cuntenutu di ssa ghjurnata.
Chì ghjè l’obbiettivu di ssa corsa ?
L’ugittivu di ssa corsa, prima, hè d’accodda solda par prughjetti chì sò maiò pà a lingua corsa. Ci pò essa prughjetti cum’è a rialisazioni d’un centru d’immersioni, pò essa dinò a tradduzzioni d’un filmu, o allora u sustegnu à una scola assuciativa o realisazioni d’una ràdiu. ma prughjetti chì sarìani maiò è ch’anu bisognu d’un aiutu finanziariu daretu.
Cum’è hè ghjunta ss’edea di corre pè a nostra lingua ?
Simi andati à piscala in altrò ancu sè no l’avìami dapoi parechji anni in capu. Sò i Baschi chì l’ani iniziata ind’è eddi. A femu à modu nostru. L’edea hè di fà corre l’aienti chì si compra u chilòmitru. Si trasmèttini un « tistimoniu », par mustrà ch’ellu ci hè una sulidarità è un scopu cumunu. Si parte da U Borgu sin’à Sulinzara, vale à dì 90 chilòmitri.
L’edea hè d’essa presenti nant’à tuttu u tarritoriu è di fà chì l’aienti si mubilizeghji pà a lingua corsa.
Cumu fà perchì a ghjente si mubilizèghji ?
Fà chì tutt’ugnunu si compri un chilòmitru, è solu un chilòmitru chì costa 100 àuri. Ùn si ponu cumprà parechji chilòmitri. Vale à dì ch’ellu ci vola 90 parsoni diffarente chì si còmprani un chilòmitru. Di stessa manera, si pò corre ciò ch’omu vole, ma ci vole à trasmetta u « tistimoniu » à ogni chilòmitru, face chì ogni vota ci sarà una parsona diffarenti chì trasmetterà u tistimoniu. U scopu hè di fà chì assai mondu si mubilizeghja, trà quiddi chì còmprani è quiddi chì còrrini, hè a sucietà sana chì si ritrova in giri à a lingua.
Par cumprà si ponu avè parsoni individuali ma dinò famiddi, gruppi d’amichi, culleghi di travaddu, cumuni, club, associ, eccèttera. Cuncerna à tutti è micca solu prufissiunali. Ùn hè micca una cumpetizioni, ùn saremu micca chilomitrati, hè una corsa di sulidarità.
U tistimoniu di a prima idizioni hè un àrburu, rializatu in legnu di scopa da Carlos Campos è pirugravatu è urnatu da Cheyenne Texier !
Hè digià un successu ?
Ferà forse un pocu caldu ma sò i prublemi sanitarii chì ci ani ublicati à ripurtà a data parechje volta. Avemu travaddatu in sottu parchi ùn sapìami micca sè no avarìami u drittu di fà ss’affare. Avà l’annunciemu ufficialamenti, avemu già avuti successu senza publicità, postu chì semu dighjà aldilà di 90 chilòmetri. Ci hè digià 97 antità chì si sò prununciati per riservà un chilòmitru. Oramai ricumincemu i risirvazioni è duppiemu i chilòmitri, vale à dì dui participanti pudarani corra u listessu chilòmitra.
U scopu ?
U scopu hè di mustrà a nostra vulintà, di firmà indipendenti indi i prughjetti è di riescia à mubilizà u pòpulu corsu nù a so tutalità. Cù ssa corsa quì hè a Corsica sana chì pò essa mubilizata è aldilà a diaspurà. Hè veramenti un bellu prughjettu. Hè una corsa chì si voli fistiva, chì voli impignà u più pussìbuli d’aienti è chjamata à crescia d’una annu à l’altru. •
Informazione è scrizzione : https://parlemucorsu.corsica
