Messa in ballu in u 2016 da u presidente Ghjuvan’Guidu Talamoni, l’Assemblea di a giuventù permette à i giòvani da 16 à 29 anni di furmassi à a vita pulìtica è à u funziunamentu di l’istituzioni di a Corsica. Hè solu cunsultativa ma, cum’è i so maiò, « l’eletti » ci adòpranu muzioni, raporti è risuluzioni chì sò trasmesse à l’Assemblea di Corsica per esse aduprati. A presidente, Nanette Maupertuis presida e riunioni cù dui vicipresidenti è dui secretarii eletti frà i giòvani. I 62 membri sò scelti per dui anni da una ghjurìa dopu à candidature è secondu à trè cullegi : i studienti, i sindicati, è e candidature lìbere. L’assemblea s’adunisce omancu trè volte à l’annu una ghjurnata sana. Conta oghje sei gruppi di manca, di dritta o naziunalisti.
Un novu gruppu vene di furmassi cumpostu da 10 giòvani : Ange-Toussaint Bartoli, Ursula Biancardini, Rodolphe Casabianca, Marcu Casanova, Jean-Baptiste Geronimi, Marie Lanzalavi-Patacchini, Ilyana Melliti, Florian Riolacci, Pauline Santelli, Lisandru Simeoni. Eccu u so cumunicatu.
« Cari culleghi,
Avemu l’onore d’annunziavvi a creazione di u nosciu gruppu Chjama à l’unità cumpostu da dece cunsiglieri di l’Assemblea di a ghjuventù per issa mandatura 2024-2026. Ci custituimu cume un gruppu naziunalistu chì adunisce attempu militenti autonomisti è indipendentisti riuniti in giru à principi d’autodeterminazione è d’emancipazione di u populu corsu.
U naziunalisimu pridicatu da noi hè un patriotisimu umanista è democraticu impiantatu ind’è valori di sulidarità incù l’altri populi in lotta. Per prumove issu naziunalisimu giratu versu l’Auropa, a nostra azzione vole rinforzà i liami trà a ghjuventù militente di l’altri populi minoritarii. Issu naziunalisimu apertu si scrive in u riettu di l’estremisimu è u populisimu è indè a lotta contr’à e strutture mafiose. A nostra azzione hè girata versu à a difesa di a nostra identità culturale, linguistica, patrimuniale è storica è ancu versu a difesa di l’interessi suciali è ecunomichi di u populu corsu. Si scrive dinù indè a vulintà di ghjustizia suciale è eculugica nant’à nostra tarra.
Incù a vulintà d’incuraghjisce i debatitti in iss’assemblea, u nostru gruppu vole favurizà a cullaburazione incù l’altri gruppi di l’Assemblea di a ghjuventù nant’à parechji sughjetti. Cunsiderendu sta pruposizione, chjamemu à a creazione d’un intergruppu naziunalistu per favurizà l’unità è a cunvergenza di u muvimentu naziunale.
U nosciu gruppu chjama à l’unità tutti i cunsiglieri chi volenu agisce à prò d’issu prughjettu cullettivu giratu versu un naziunalismu apertu è umanista. » •
