U 18 di ghjugnu 2020, u Cullettivu « Pour Que Vivent Nos langues », Da ch’elle càmpinu e nostre lingue, hà dumandatu audienza à u Presidente di a Repùblica, per rimètteli una lèttera chì dinunzia a pulìtica oghje cundutta è ch’affoca e nostre lingue. Ci hè di chè à fassi penseru cù tutti i dispusitivi novi presi da u guvernu, pè u più a riforma Blanquer di u bascigliè.
Sta dimarchja hè stata appughjata da 105 parlementarii, deputati aurupei, deputati à l’Assemblea naziunale, Senatori. A lèttera hè stata rimessa à l’Eliseu da Francescu Alfonsi l’aurudeputatu di a Corsica, è Paul Molac, u deputatu britone à u Palazzu Bourbon.
U scopu hè di strappà à u più in furia misure per salvà e lingue regiunale.
D’istatina, u 24 d’aostu, l’Eliseu hà infurmatu u Cullettivu chì u Presidente di a Repùblica hà dumandu à u ministru di l’Educazione Naziunale, Jean Michel Blanquer, di riceve una delegazione di u Cullettivu. Hè una bona nutizia. Ancu sè, per avà, a data di ssu scontru ùn hè micca stata cumunicata.
U Cullettivu adunisce tutti l’associ, i sindicati è uni pochi d’eletti chì lòttanu pè a difesa di e lingue è e culture regiunale.
Urganisèghja una « Ghjurnata di e lingue regiunale » u 10 d’ottobre pròssimu di fronte à i Retturati di Francia. Chjama à i parenti, l’insignanti, l’allevi, i militenti di a difesa di e nostre lingue à adunìscesi da fassi sente di manera cullettiva è cuncertata in tutti i lochi induv’ellu ci hè una lingua à difende.
In Corsica, l’azzione serà cundutta, cum’è in altrò, da i membri di u Cullettivu « Da ch’elli càmpinu e nostre lingue », vale à dì associi, sindicati è urganìsimi di a difesa di a nostra lingua cum’è l’Associi di l’Insignanti di è in Lingua è Cultura Corsa (AILCC), Praticalingua, u Cullettivu Parlemu Corsu, u STC Educazioni, l’Associu di i Parenti Corsi, eccèttera…
State attenti à e so chjame ind’è a stampa è adunìtevi cù noi u 10 d’ottobre, da ch’ella campi a lingua corsa !
I rinsignamenti : www.pourqueviventnoslangues.com
