Sò già 30.000 morti in Gazà è più d’un millione di zitelli, donne, omi à pate a fame è cundizioni di vita tremende. In ssu scumpientu, Israele appronta un offensiva nant’à Rafah. Sarebbe un tràmpalu di più pè a distribuzione di l’aiutu umanitariu già impeditu assai. Hà dettu Antonio Guterres, u presidente di l’Urganisazione di e Nazioni Unite, « sta nutizia ùn sarebbe solu spaventosa per più d’un millione di civili palestiniani, sunerebbe u murtòriu di u nostru prugramma d’aiutu ». A cumunità internaziunale si mubilizeghja per ottene una trègua…
In u frà tempu, nant’à i retali suciali si tròvanu annunzii è attache da tutte e mamme. I prò palestiniani è i prò ghjudei s’affròntanu à colpu di videò è d’accusazioni, quand’ellu ùn hè micca di fake-news… Quale hà tortu ? Quale hà raggiò ? A pulìtica di i culoni hè stata dannosa à i dui pòpuli. Cum’ella ferma dannosa, parte di u mondu àrabu, a vuluntà di vede sparisce Israele. Ch’omu si piazza d’una parte o l’altra, a stòria di ssu cunflittu hè bella cumplicata. Israele hà vintu u dirittu à un Statu è una terra dopu à a guerra è u fragellu di a shoah. A Palestina dinù. U fattu ghjè chì e grande putenze anu ghjucatu quì cù i bisogni, e brame è u dirittu di i pòpuli. È micca solu dapoi a fin’di a seconda guerra mundiale. E pulìtiche culuniale è l’interessi di u dettu « mondu sviluppatu » anu arruinatu l’avvene di u Cuntinente africanu chì ne pate e cunsequenze sempre avà.
Chì si pò fà oghje ? Rispettà i bisogni, e brame è i diritti di i pòpuli, ricuniscènduli è rispettènduli. L’accordi d’Oslo in u 1993 pè a cuesistenza di dui Stati ferma ancu oghje a sola suluzione per fà ch’elli sìanu assicurati è rispettati ssi diritti. Oghje ùn ci hè micca suffrenza chì supraneghja l’altra. Ci sò dui pòpuli chì sòffrenu di manera tremenda. È ci sò ciucci chì mòrenu, da parte è manca. Ùn hè micca suppurtèvule. Nimu ùn ghjunghjerà à pienghje megliu un zitellu chì more quì, disprezzendu un zitellu chì more culà. E cose ùn ponu accunciassi diciendu chì l’uni sòffrenu di più chè l’altri. Israele s’hè custruita è hà sempre campatu in u terrore di l’òdiu chì a circundava. Ùn si dà micca u dirittu di a cumpassione pè e suffrenze palestiniane. S’hè custruita un Statu militare induve giuvanotte è giuvanotti, u pòpulu sanu, si sò militarizati per difèndesi. Para cusì l’aggressioni di dumane è si vindicheghja di l’aggressioni d’eri. Ùn si misura micca u traumatìsimu di u 7 d’ottobre. È s’omu vole sòrtesi un ghjornu di ssu cunflittu, ùn ci vole micca à rilativizà sta ferita. Nemancu sminuìla di pettu à quelle ch’elli càmpanu oghje i Gasaui.
U pòpulu palestinianu hè un pòpulu martòriu, eri cum’è oghje. Hà fattu a scelta d’un terrurìsimu di Statu anch’ellu per prutègesi. Campa ind’è l’òdiu di stu vicinu impostu ch’ellu ùn hà mai accettatu. N’arricoglie tutti i frutti macerbi… Eppuru, da parte è manca, ci sò israeliani è gasaui pronti à tende a manu, à parlassi, à ascultassi è à spàrtesi ssu territoriu, da ch’omu li ricunnosci u dirittu à l’esistenza è à a pace. Ghjè a sola, l’ùnica suluzione. Un ghjornu, ci volerà chì l’omi, da parte è manca, a capìscinu. Stu ghjornu venerà induve una generazione nova si peserà per custruisce sta pace tantu bramata. Ch’o sinò ùn ci serà chè làcrime è sangue, da parte è manca. •
