Demeter hè a divinità greca di e falcere. Ma hà imprestatu u so nome à una cosa menu simpàtica… Forse ne avete intesu parlà : Demeter hè una cèllula di rinsignamentu di a Gendarmerìa naziunale creata in 2019 per luttà contr’à e degradazioni in e splutazione agrìcule. Hè stata creata da u ministru di l’Interiore di tandu, Christophe Castaner, à a dumanda di a FNSEA (chjìbba !), a Federazione naziunale di i sindicati di i splutatori agrìculi per luttà contr’à l’azzioni di i militanti di a difesa di l’ambiente. U travagliu di Demeter hè d’anticipà e minaccie contr’à l’azzioni « di natura ideologista », ch’elle sìanu simbòliche o più dure…
L’associ di difesa di l’ambiente dinùnzianu e derive di st’urganìsimu è l’attache contr’à a libertà di spressione. L214, Pollinis è Générations Futures, sustenute da a Lega di i Diritti di l’Omu, anu purtatu lagnanza di pettu à u Tribunale Amministrativu. Dapoi, hè una guerra ghjudiziaria. L’associ dumàndanu ch’ella sìa sciolta sta cèllula di rinsignamentu. U primu di ferraghju 2022, u tribunale hà ordunatu à Demeter di piantà certe di e so attività, diciendu chì a prevenzione contr’à l’azzioni di natura ideològica ùn dipende micca di a gendarmerìa è di u còdice di a securità interiore, è dunque ch’ùn hà micca una « basa legale ». U guvernu hà fattu appellu è a Corte d’appellu di Parigi hà rinviatu l’affare di fronte à u Cunsigliu di Statu.
U scopu di Demeter hè d’intimurisce i militenti di l’ambiente cù misure di ripressioni per affucà a so voce. Si vòltanu contr’à st’urganìsimu dinù a Cunfederazione Paisana, sindicatu chì difende un agricultura paisana, u Centru naziunale di ricerca scientìfica (CNRS), chì difende un agricultura biològica, a stampa dinù cum’è Radio France chì dinunzia a ripressione contr’à i so giurnalisti. Di fatti s’agisce quì d’un cunfrontu trà agricultura biològica è agricultura industriale, vale à dì un agricultura chì priserve l’ambiente di pettu à l’agricultura intensiva è destrutrice di l’abitati è di a biodiversità. France Nature Environnement indita u partenariatu trà a FNSEA, i JA (giòvani agricultori) è u guvernu. Demeter hè una cèllula guvernamentale d’intimidazione è di ripressione per parà è sanziunà l’azzioni chì dinùnzianu l’agricultura intensiva. L’associ anu scrittu in 2020 à u ministru di l’interiore Gerald Darmanin per dumandà a dissuluzione di Demeter. Ùn sò micca stati intesi. Sò in mira l’animalisti, l’antispecisti, l’ambientalisti è tutti l’attivisti chì s’uppònenu à u sistema in piazza, dìcenu L214 chì lotta contr’à a maltrattenza animale è Pollinis chì difende l’ape è l’insetti pullinisatori. Basta à ch’ellu s’agisce « d’atti cummessi cù una mutivazione ideològica » o di « sèmplici cumpurtamenti chì tòccanu à l’imàgina di l’agricultori (anti-bashing), senza infrazzione »… Documenti interni à Demeter dìcenu chì i so scopi sò « d’identificà i rìsichi d’offesa parte di l’animalisti, l’antispecisti è l’ambientalisti », « d’anticipà tutte l’offese (cumprese l’offese ch’ùn sò delittuale) cum’è l’offese à l’e-reputazione ». S’ùn hè micca quì un attacca contr’à a libertà di spressione, cosa hè ? Demeter privatizeghja i mezi ripressivi di u Statu per permette à e multinaziunale di strughje u vivu. A lotta contr’à i pesticìdii è a priservazione di l’ape hè chjaramente in mira.
Arritti vi dumanda di ziffrà è sparghje a petizione di l’associ : www.pollinis.org o https://bit.ly/3wUtkkZ •
Fabiana Giovannini.
