« Cari amichi, auditori di l’emissione o nò, oghje mi permettu, circendu di fà cortu, di divvi duie parulle nant’à a festa ch’o circhemu di fà u 20 di settembre prussimu in Corti pè i vint’anni di “Dite a vostra” à l’Università di Corsica. » Cusì lampa una chjama nant’à a so pàgina Facebook, u fundatore di l’emissione a più pupulare nant’à RCFM (cù forse u forum), Ghjuvan’Carlu Marsily.
Ci hà messu tutta a so passione. Passione di a lingua, passione di a ghjente, passione di u scàmbiu. Dite a vostra hè un appuntamentu per l’innamurati di a nostra lingua, ch’elli sìanu sapienti o principienti, tutti à paru cù u piacè di sparte, di sparghje, d’amparà, di tramandà ! Chì bella missione ch’ella s’hè data st’emissione, è chì più bella testimugnanza d’una lingua viva chè di sèntela parlà nant’à l’onde ? Oghje Ghjuvan’Carlu Marsily lampa dunque una chjama da festighjà sti vint’anni inseme d’impegnu, cù tutti quelli chì a vòlenu, ind’è l’allegrìa è a fratellanza. A famiglia « Dite a vostra » hè fatta per esse allargata. Sè vo tenite caru à a lingua corsa, affaccàtevi, chì piazza è spàziu di parulle ci n’hè per tutti ! « Ùn serà un spettaculu ma una cuncolta di passiunati, à chì vole cantà canterà, senza artifizii o cusì pocu, circheremu à fà piazza à tutti, prufeziunali cum’è amatori, l’idea hè di sparte, di mughjà è briunà u nostru amore à sta lingua ch’ùn vole more » dice torna Ghjuvan’Carlu Marsily.
Allora ritenite sta data di u 20 di sittembre è cuntinuate à suminà cum’hè statu fattu dapoi 20 anni à traversu à l’onde. Hè cusì ch’ella camperà a nostra lingua !
Ghjuvan’Carlu risponde à e quistioni d’Arritti.
Face 20 anni ch’ella hè stata lanciata l’emissione « Dite a vostra », còntaci st’avventura, perchè ghjè un avventura, nò ?
Hè nata un ghjornu di settembre di u 2005, ùn sapia tantu chì fà dopu à dui anni di matinale duve mi si paria d’ùn pudè sprimà mi cumu a vulia. Tandu, per fala corta, vecu passà un fax duve ampargu ch’in Santa Lucia di Purtivechju, un associu prupone un attellu di lingua corsa è chì ci vole à parlà solu u corsu, pocu impreme u livellu d’ognunu è chì st’associu porta u nome di « Dite a vostra ». Hè cusì ch’ella hè principiata st’epopea. Aghju dumandatu à Mascone s’ellu a si sentìa d’esse u cumpare, hà dettu di sì sùbbitu è m’arricordu di a prima emissione èramu quì ad aspettà e prime telefunate.
Chì ghjera u scopu di l’emissione ?
L’idea era di dà un spaziu abbastanza largu à a lingua, sceglie un suggettu è di parlane solu in lingua corsa. D’una certa manera, aghju cercatu di mette un obligu à a ghjente per furzà li à risponde in corsu. Ùn emu aspettatu tantu prima di capì chì st’idea currispundia à un bisognu di i nostri auditori, hè picciatu in furia, in fatti c’era una brama di parlà è di sente u corsu.
È l’auditori, quale sò ? L’emissione hà vintu sùbitu u so pùblicu o ci hè vulsutu u so tempu ?
Pè u più l’auditori sò ritirati, chì l’ora di diffusione ùn ci permette micca d’avè l’attivi, ma cù i mezi muderni, i sciffri di i podcast ci permèttenu di vede è di fà u custattu chì i ghjòvani ripìglianu assai l’emissione. Ci vole à sapè chì « Dite a vostra » hè sempre nu e trè prime emissioni caricate nant’à a tela numerica. Què indetta chì l’interessu ind’è a ghjuventù hè assai assai di primura. In fatti cunsidereghju chì quelli chì participèghjanu sò i nostri prufessori, c’arrèganu u so sapè, è circhemu d’avvicinà quant’è pussìbule e generazione. Vogliu aghjustà chì a prisenza di Ghjuvan Ghjaseppiu Franchi guasi un’annu dopu à a creazione c’hè per assai ind’è l’interessu ch’ella ci porta a ghjente, u s’aiutu è u s’impegnu sò stati elementi fundali di u successu di l’emissione.
Si risente un spìritu « Dite a vostra »… Còntaci cosa hè per tè…
Pudemu accertà chì hè nata una cumunanza. C’hè ciò ch’ellu si sente eppò c’hè tutta sta lea suciale ingiru à l’emissione. Una forte amicizia tra di noi hè nata, ognunu hà u penseru di l’altru, ùn c’hè pulìtica à mezu, l’accunsente hè sinceru è sodu. Oramai sò persuasu chì l’emissione hà permessu à tutti di rispittà l’altru, rispettu di a parlata, di a pulinumìa, di sta diversità chì face a nostra ricchezza. C’hè un spìritu « Dite a vostra », è stu spìritu hà aiutatu assai à fà cambià certe mentalità, certi sguardi di pettu à a lingua. Circhemu sempre ad allergà u chjerchju di a nostra famiglia, dunque dicu à i vostri lettori di francà u passu è di fà un pezzu di strada cù noi.
Cumu si porta a nostra lingua secondu à tè ?
C’hè forse duie manere di vede oghje a lingua per me. S’ellu si esce fora cù in capu u mondu di nanzu hè certa chì nasce u spaventu. S’ellu si piglia un pocu di rinculu, c’avvedimu di u travaglione fattu st’ùltimi anni da ùn sò quantu passiunati. Da u riacquistu sin’à Scola corsa ; mi dicu chì forse si piglia a strada bona. Hè da l’iniziu di a zittellina ch’ellu ci vole principià à mette in l’arechja a lingua. C’hè l’immersivu ma u bislinguìsimu hè più ch’è mai impurtante. Diceraghju dunque chì sò piuttostu pusitivu di spìritu à stu livellu. Ma ùn m’impediscu di pensà : chì lingua emu da salvà è tramandà ? Ùn ci vole micca perde u gèniu è u sale di sta lingua, tocc’à a tuttu ognunu di fà casu. Eu u primu ma dinù quelli chì sò in respunsabilità aduprèndula di modu oghjincu nu u so mistieru.
Ci seria tantu à dì, sò un pocu delusu da l’impegnu purtatu da i pulìtichi in generale, i media à contu meu ùn fàcenu abbastanza, c’hè troppu aiuti sviati à nome di a lingua in prughjetti chì si sèrvenu di a lingua più ch’elli sèrvinu elli a lingua. Per accurtà u mo parè, basta di fane un « alibì », tinta ch’ella hè, merita d’esse cunsiderata assai di più da i so figlioli prima, ma ancu da quelli chì vènenu à suchjacci u sangue cum’è predaghji interessati solu da ciò ch’elli ponu buscà. Di fane una forza econòmica hè certa è imperativu, ma chì tuttu què ghjuvessi à u so spanamentu mi pare assai di più di primura.
Di sittembre pròssimu, ci serà dunque un appuntamentu à l’Università di Corsica. Cumu s’hà da passà ?
Lampemu una chjama à tutti, à truvacci u 20 di settembre à partesi da 11 ore à l’Università di Corsica, festighjeremu i 20 anni di l’emissione, è ch’ognunu porti a so robba per manghja è sparte tuttu inseme.
Pensu chì feremu un festone à l’usu nostru, à sensu, paisanu, populare, senza artifizii cù una principessa chì serà onorata da noi tutti, vogliu parlà di a nostra lingua cusì cara. •
