Arritti chjama à manifestà per Scola Corsa. U nostru settimanale hà raghjuntu ben intesu u cumitatu di sustegnu è chjama à tutti, partiti pulìtichi, sindicati, associ, imprese, citatini à raghjùnghjeci u 30 di maghju à pàrtesi di 2 ore è mezu dopu meziornu di fronte à u palazzu di Ghjustizia d’induve parterà a manifestazione.
Ci tocca à esse numarosi assai da salvà a nostra lingua di u perìculu di a disparizione.
Scola Corsa s’hè custruita nant’à a forza di i parenti è l’insignanti chì s’impègnanu à u cutidianu per dà un insignamentu di qualità à i zitelli è fanne una generazione bislingua. Aiutèmuci per salvà Scola Corsa ! Mubilizàtevi è mubilizate parenti, amichi, vicini !
Da sapè dinù chì Arritti urganizeghja un Scontru a matina à 10 ore à u museu di Bastia cù a custiziunalista Veronique Bertile, u deputatu di u Morbihan Paul Molac, u senatore di Corsica Paulu Santu Parigi, u rispunsèvule di e scole basche, Peio Jorajuria, è u presidente di a cummissione di l’affari custituziunali à l’Assemblea di Corsica, Rumanu Colonna. U tema : e lingue regiunale è a custituzione (leghje u nostru cap’artìculu).
Sìate numarosi per sta ghjurnata sana sana cunsacrata à l’avvene di a nostra lingua.
Eccu u cumunicatu di Scola Corsa per raghjunghje u cumitatu : www.scolacorsa.corsica
« Cinque anni fà venìanu creati i nostri primi stabilimenti. Oghje Scola Corsa hà fattu a dimustrazione chì u mudellu immersivu assuciativu hè indispensèvule à a salvezza è à u spannamentu di a nostra lingua.
Plebiscitatu da a sucetà isulana, Scola Corsa deve cuntinuà à sviluppassi.
Eppuru, oghje, Scola Corsa hè in perìculu !
Un ricorsu prefetturale à u Tribunale amministrativu rimette in càusa u finanziamentu di a Cullettività di Corsica è u Statu ricusa di piglià in contu a dumanda di cuntrattualisazione generalizata d’11 posti indispensèvuli da securizà l’avvene di u retale.
8.000 citatini, 400 intraprese, 100 merrie, 80 artisti, sindicati, associi, istituzioni, eletti d’ogni tendenza ci anu digià raghjunti è ci pòrghjenu u so affollu.
Si tratta oramai di rinfurzà stu slanciu di sulidarità maiò.
Hè statu creatu un cullettivu di sustegnu à Scola Corsa. Ssu cumitatu chjama à a mubilisazione à prò di l’associu è di a lingua corsa in generale è à una manifestazione in Bastia, sàbatu u 30 di maghju à 2 ore è mezu.
Dumandemu à tutte l’organisazioni citatine bramose d’aiutacci d’aderisce à stu cullettivu.
Hè ora di strappà un statutu degnu pè a nostra lingua, patrimoniu sacratu di sta terra.
Inseme salvemu à Scola Corsa. » •
