È dì chì l’Auropa vole àpresi à a Turchìa !… U paese casca in a dittatura sott’à l’ochji di u mondu chì si ne stà mutu… U presidente Erdogan cunduce una vera purga contr’à tuttu ciò chì pensa di manera lìbera in Turchìa. Cunduce u paese d’una manu di farru dapoi anni è u 15 di lugliu scorsu uni pochi anu pruvatu à vultassi. U putsch hà fiascatu è dapoi, u « statu d’urgenza » hè statu pruclamatu. 110.000 funziunarii sò stati rinviati o suspesi. 170 stampe sò state chjose, 140 ghjurnalisti arrestati, 777 carte di stampa annullate… 37.000 parsoni sò state arrestati, frà i quali parechji omi pulìtichi di l’uppusizione demucràtica, frà i quali uni pochi di deputati, ma dinù ministri è rispunsèvule di u guvernu stessu d’Erdogan, è parechji « pensori », prufissori, artisti. Cù elli torna, ghjente chì travàglianu ind’è l’armata, a pulizza è a ghjustizia. 1229 associi sò stati chjosi, pè u più quelli di difesa di i diritti di l’omu. E prigiò sò tracarche, è si parla ancu di ristabilisce a pena di morte… L’Auropa s’inchieta, ma cù u penseru di u terrurìsimu, ùn dice nunda. Puru tutt’ognunu sà bè chì Erdogan prufitta di ssa scusa per pigliàssine à a demucrazia… In Turchìa stessa, si dice in carrughju chì Erdogan hè u solu à avè leami cù i terruristi islamisti è ch’ellu puderebbe ancu avè incuragitu à l’insottu u famosu putsch… per pudè dopu attaccassi cum’ellu vole à l’uppusizione demucràtica. Frà elli, Kilicdaroglu dinunzia a ripressione. «A mìnima critica cunduce sùbitu à una cunvucazione à u Tribunale », dice u presidente di u partitu demucràticu à l’assemblea naziunale turca. « Precu l’autorità di cunvucami ancu à mè à u Tribunale, ma ùn a fàcenu micca. Anu a paura, a sanu ch’aghju e prove di a so cuuperazione cù i terruristi. » D’apressu à Kilicdaroglu u partitu islamo cunservatore d’Erdogan à u putere dapoi u 2002, « hè a sola furmazione pulìtica turca chì cullabureghja cù l’urganisazioni terruriste islamiste ». In Auropa, l’urganisazioni di difesa di i diritti di l’omu accùsanu anch’elle Erdogan di ghjòvesi di u terrurìsimu per impastughjà l’uppusizione. A so sìbula principale hè u HDP, u partitu di a demucrazia. Creatu per difende i Kurdi à l’iniziu, u HDP hà sapiutu allargassi per risponde dinù à l’addisperu di a ghjente di manca turca, i demucràtichi, l’eculugisti, i feministi, è tutte e minurità in generale chì bràmanu di più libertà. Cù 13% à l’elezzioni legislative di u 2015, u HDP hà impeditu à Erdogan d’avè a maghjurità assuluta per mette in ballu un regime presidenziale. Tandu Erdogan hà fattu annullà l’elezzioni. Ma u HDP hà torna francatu i 10% malgratu i tràmpali à longu à a campagna ! Oghje, tutte e decisioni sò prese cù decreti presidenziali è ùn ci hè più spiccanza trà i puteri legislativu, esecutivu o ghjudiziariu. Sò survegliati è affucati e rete suciale, cum’è Facebook, Twitter, Youtube… Pocu à pocu si mette in piazza un Statu d’eccezzione in Turchìa chì minaccia ancu a demucrazìa mundiale.
Fabiana Giovannini.
