In fin’di settimana, a sentenza di u prucessu di Madrid cascherà. Omu s’aspetta à sentenze affannose è inghjuste. Si parla di parechji anni di prigiò per ss’omi ch’ùn anu fattu chè dà a parolla à u so pòpulu, urganizendu, cum’ellu era previstu in u so prugramma pulìticu, un riferendum d’autodeterminazione u primu d’ottobre di u 2017. Puru, u drittu à l’autodeterminazione hè un drittu internaziunale ricunnisciutu da e Nazioni Unite. I sei membri di u guvernu catalanu, Oriol Junqueras, vicepresidente, i ministri Raul Romeva, Dolors Bassa, Joaquim Forn, Josep Rull, Jordi Turull, è i presidenti d’associi Jordi Sanchez (Assemblea Naziunale Catalana) è Jordi Cuixart (Omnium Cultural) sò incausati di ribellione. Dinù a presidente di u parlamente catalanu, Carme Forcadell, incausata d’avè urganizatu un dibàttitu nant’à l’indipendenza di a catalogna à u senu di u parlamentu… Tutti sò in prigiò dapoi quasi dui anni. In più, sò dui anni dinù chì cinqu’altri membri di u guvernu catalanu sò in esiliu per scappà à ssa ripressione spagnola, frà i quali u presidente di a Generalitat, u guvernu di Catalogna, Carles Puigdemont.
A Lega di i Diritti di l’Omi, Amnesty International, è parechji associi, partiti pulìtichi o guverni in Auropa dinùnzianu l’arbitrariu chì s’abbatte nant’à a Catalogna. L’osservatorii internaziunali di u prucessu dìcenu chì e guaranzìe d’imparzialità ùn sò state rispettate è dinùnzianu u caràtteru pulìticu è ideològicu di a ripressione chì mena a Catalogna dapoi dui anni. U 23 di sittembre scorsu, parechje altre arrestazioni sò state fatte à l’orlu di u ghjornu, contr’à militenti ch’ùn anu cum’è tortu chì quellu d’esse è di rivendicassi indipendentisti.
Pè u Cullettivu Sulidarità Corsica-Catalunya, u drittu à l’autodeterminazione hè un drittu universale.
I Trattati internaziunali chì ne pàrlanu, sò scritti in a custituzione spagnola, chì dice ch’una volta aduprati, ssi Trattati fàcenu parte di l’ordine ghjuridicu internu à u Reame di Spagna.
U drittu à l’autodeterminazione deve dunque esse ricunnisciutu in Ispagna dinù. In tutti casi, bramà ssu drittu, ùn deve micca cunduce a ghjente in prigiò ! Ciò chì si passa in Catalogna hè un scàndalu di demucrazìa. In Francia, si ne parla pocu. I grandi mèdia, l’intelligentsia, si tàcenu. Hè un veru stumacheghju. In Spagna, mènanu e batterchjate cum’è in e dittature.
Libertà pè i prigiuneri pulìtichi !
Fabiana Giovannini.
