Что у Бога есть мокрое, он может высохнуть
Čto u Boga estʹ mokroe, on možet vysohnutʹ
Ciò chì Diu hà incrusciatu, u pò asciuvà.
Salute à tutti. V’avia lasciati, a settimana scorsa, cù l’idea chì, spessu, un diu, qualsìasi a relighjone, era creatore di u mondu, unniscente, unniputente, unnipresente è unnibenevulente. Fideghja chì ghjè u casu in corsu, cum’ella si pò vede ind’una manata di pruverbii : Quandu u frate s’annega, hè vulintà di Diu. « Iè, po ci hè dinù : Ùn trema una foglia chì Diu nùn voglia. » Bellu questu. Torna unu : Diu hà fattu eppo farà.
U primu puntu d’interessu hè a pràtica di l’interri, 100.000 anni fà, cù totem incaricati d’accumpagnà u mortu. Sarebbe u segnu chì, tandu, si credia à un aldilà chì seguitava a vita terrestra. Si tratta, ind’e ste relighjoni primitive, di forze spirituale chì ponu casticà o ricumpensà l’omi. D’altronde, prupunenu à una cumunità una murale, règule di vita, riti prupiziatori, o ancu esistenza d’un intercessore trà l’omi è u divinu.
U fattu si stà chì a manera di numinà e divinità è di raprisintalle hè diversa sicondu à l’èpica è à a geugrafia. S’è no demu, per un dettu, un’uchjata à l’induìsimu, a Trimūrti (« trè forme » in sanscrittu) spieca l’universu sanu : Brahmâ hè u sìmbulu di a creazione, Vishnu di a preservazione è Shiva di a destruzione. D’altronde, frà e grande divinità di u mondu mesuputàmicu (IIIu millenariu nanzu à Cristu) pudemu mintuvà Enlil, Enki/Ea, Inanna/Ishtar… chì i nomi èranu accumpagnati, in lingua sumèrica, d’un ideogramma spùticu : in quantu à u buddhìsimu, non solu Gautama Bouddha niga l’esistenza d’un diu creatore, ma esìstenu dinù parechji tipi di Buddha.
Per ciò chì tocca à e trè relighjioni di u libru, cioè l’ebraìsimu, u cristianìsimu è l’islamìsimu, si tratta d’una revuluzione culturale chì impone à a maiò parte di u mondu, u monoteìsimu. In ogni situazione, Diu intervene à prò o contru à u pòpulu, senza chì omu possa capisce u perchè. Sta divinità hè chjamata Yahweh (u tettragramma YHWH), Diu è Allah. A quistione di a piazza di e donne si pone : I Cristiani t’anu a vèrgine Maria, a kabbale Shekhina, è u coranu, malgratu ciò ch’è no pudemu pinsà, mette à paru u masciu è a fèmina. Per compie, si pò ammintà chì ùn ci hè raprisintazione di Diu ind’è l’Ebrei è i Musulmani ma ch’ùn ci hè relighjone senza antropomurfìsimu : Diu pensa, face cum’è noi. •
Eccu l’ora di a canzona.
