Canta, sona, scrive puesìe è canzone, Antonu Marielli hè un attore di u riacquistu. U Sartinese hà creatu u gruppu Diana di l’Alba in u 1978, è sumena dapoi in tutti i paesi di Corsica è d’altrò induv’ellu sparghje lingua è cultura corsa. Militente culturale appassiunatu è di prima trinca, hè dinù prufessore di Stòria è di Lingua è Cultura Corsa. Omu di a terra, hè un innamuratu di a natura, a muntagna, i paesi, a so ghjente, l’usi, e tradizioni. Ci hà già rigalatu trè libri di stòria, di fole è di spressioni. Dapoi parechji anni, st’appassiunatu di a lingua ma dinù di u linguagiu è e parulle chì si tramàndanu cum’è sprichji di a vita pupulare, s’hè lanciatu nant’à un òpera maìò, travaglione di ricerca è racolta pè a quale hè esciutu mese fà u terzu toma à l’edizioni Scudo : u Dizziunariu Temàticu !
U primu toma hè statu publicatu in u 2021, trattava di u corpu umanu, e malatìe, l’amore, a sessualità, i sensi, i sìntimi… U secondu toma, publicatu in u 2022, hè cunsacratu à a famiglia, l’omu, a donna, u zitellu, a scola, i ghjochi, i panni, a casa, u focu, a cucina, u beie è u manghjà, a religione, l’imaginariu, e credenze, a morte, u dolu, l’allevu, l’agricultura…
Ssu terzu toma ci prupone di visticà a pesca, u mare, l’ecunumìa, l’artisgianatu, i sapèfà, a mùsica, a vittura, u drittu, a machja, a furesta, a caccia, l’animali, a terra, a muntagna, a natura, l’acqua, u tempu chì passa, e feste, e fole, e stelle…
Più di 500 pàgine di ricerca nant’à i detti è e parulle chì fàcenu l’uriginalità, a musicalità di a nostra lingua. « A parolla hè un segnu. U segnu hè a scrittura… » conta l’amicu Antonu Marielli ch’hè cresciutu in Sartè, è cù l’amore di e parulle, hà racoltu cusì tante spressioni ch’ellu nutava à misura di i scontri è e scuperte ch’ellu fecìa. À longu à stu preziosu ammansatu, l’edea l’hè ghjunta di racòglielu in un dizziunariu, uffrendu ogni tema cum’un tesoru d’identità. « Vulia tramandà tuttu què. Fora di i mei, aghju fattu u giru di a Corsica, cù Diana di l’Alba o in tantu chè guida di muntagna, scuntrendu tanta ghjenti. Ci era sempri una parolla persa o ch’ùn cunniscia micca. Tandu, tuttu u mondu parlaia corsu… »
Ci vole a passione, è a passione l’hà, l’amicu Antonu ! In tuttu, à longu à ssi 35 anni, hà racoltu 250.000 parulle è spressioni ! Chjìbba ! Vale à dì 1200 pàgine !
Cusì, risponde à parechje quistioni ch’omu pò pònesi, è ghjè un arrichiscimentu maiò per l’amparera di a nostra lingua ! Cumu si dìcenu certe parulle, cume recto-verso per un dettu ? Latu è rilatu… o versu è giriversu. Cumu spiecà i culori ?
I sfarenti toni di grisgiu, di giallu o di turchinu ? O tutte e parulle in giru à l’acqua, a pìcula surgente : u piscinu… l’acqua sottuterra : a chena, a falla, l’acquigna, l’acquifera, a vena… E parulle per chjamà l’insetti in tutti i so stati di vita, e sfarenze pezzi di u mutore di una vittura, i strumenti o i livelli di misura, cumu si chjàmanu l’acelli, o torna cumu si chjama un cignale di dui o trè anni, cumu si chjàmanu i so chjuchi eccèttera, eccèttera…
I Dizziunarii Temàtichi d’Antonu Marielli sò passiunanti, sò libri aperti nant’à a richezza di a nostra lingua è danu chjave pè u so usu cutidianu. U peccatu forse, ghjè ch’ellu ci vulìa un lèssicu alfabeticu per truvà megliu e parulle chè no circhemu. Ma forse ghjè una manera d’invitacci à leghje accuratamente, tema dopu à tema.
Si tròvanu dinù spressioni anziani ch’ùn si dìcenu più è ch’omu pò riacquistà è rinvivisce.
Hè detta : s’agisce quì di travaglià ancu noi, amparendu, esercitèndusi. Vultemu à scola, ugnunu à u so rìtimu. Torna un bellu rigalu per Natale. Evviva a nostra lingua ! •
