Era di Sermanu, campava in Sermanu, praticava l’usi di Sermanu, particularmente l’arte di u cantu in paghjella: Bébé Mariani hè statu à u core di a trasmissione di a cultura corsa, cuminciata à a fine di l’annate 50 cù u gruppu a Mannella, ch’ellu hà criatu cù Ghjacumu Luciani è u pueta Gregale.
Era dinù quì, in Sermanu torna, quand’ellu hè statu criatu Canta u Pòpulu Corsu da Gjuvan Paulu Poletti, Minicale, Petru Guelfucci è Saveriu Valentini. Senza scurdassi di u ballu corsu, rifundatu in Sermanu in giru à Filice Guelfucci è u so viulinu : Bébé hà aiutatu assai quand’ì Tutti in Piazza ci hà urganizatu e so prime « Feste di u viulinu è di u quatrigliu » à a fine di l’annate 90.
Bébé Mariani era l’ànima d’una grande famiglia, quella di i militanti d’una cultura viva. Oghje sò tutti tocchi da ssu dol.
