L’8 di marzu serà a ghjurnata di a donna.
Appuntamentu annuale per ramentà ciò ch’ellu hè u so cutidianu di miseria in u mondu. Trà donne chì mòrenu sott’à i colpi di u so cumpagnu, à quelle chì sò viulentate, ammuzzate, mantenute in a sottumissione, u sottusviluppu, a limòsina… simu sempre à sicutera in parechji paesi di u mondu ! Spessu a donna hè vista cum’un peccatu, un èssere inferiore, un prublema. In i paesi più sviluppati dinù, l’usi fàcenu ch’elle sò paccate di menu chì l’omi, è menu cunsiderate di manera generale.
A donna deve accresce i so sforzi per pudè cuntà à paru di l’omi, à u travagliu, in famiglia, in pulìtica, in quasi tutti l’atti di a vita in sucietà. Allora, cum’è tutti l’anni ci saranu l’8 di marzu, un bullore d’artìculi da tutte e mamme in tutti i mèdia. Ci seranu uni pochi di messagi, d’umagi, è ancu, forse, per une poche, màzzuli di fiori offerti ! L’omi pulìtichi feranu belli discorsi per unurà a donna, salutà u so curagiu, a so forza. indignassi di a so gattiva sorte…
In Corsica dinù, averemu u drittu à uni pochi di riguardi è tant’altre allisciature.
Aspetttendu… a messa in piazza di u Cunsigliu Ecunòmicu suciale ambientale è culturale di a Corsica stu primu di marzu in Aiacciu hè statu torna una bella dimustrazione di maschjezza… Nant’à 63 membri, solu 15 sò donne! È certi omi l’anu ancu signalatu cum’un prugressu! Umbeh!… A lege nant’à a parità hà permessu d’impone nant’à liste di candidati à l’elezzioni una raprisentazione à paru –o quasi – trà omi è donne ! Dicu quasi perch’è, cum’elli sò i maschji spessu chì sò à cunduce ste liste… qualsìasi u nùmaru d’eletti ottenutu, a maiò parte di u tempu sò più numarosi l’omi chì e donne à esse eletti !
È si pò capisce dinù chì l’affare si cumplichèghja torna, quand’omu dumanda à l’urganisazioni di a sucietà civile –vale à dì sindicati, associi, imprese– di designà i so raprisententi à u Cunsigliu ecunòmicu suciale ambientale è culturale. U più suvente, sò omi à pone candidatura è à esse ritenuti ! Face chì e donne ùn raprisèntenu chì 24% di u microcosmu di a sucietà civile ! Vi diceranu, quelli chì anu u putere di cambià e cose, chì ùn hè colpa soia è ch’iss’urganisazioni, ùn anu chè da designà e donne! Infine chì, s’ellu ùn ci era stata sta lege nant’à a parità, cumu pensate chì sarebbenu cumposte oghje e liste da a dritta à a manca è à i naziunalisti ? Dapertuttu in u mondu, a donna ferma un cursore per misurà u livellu di demucrazia d’un paese.
Fabiana Giovannini.
