Ind’è a nuttata di u 31 d’aostu à u primu di sittembre scorsu un putente terramotu di magnitùtine 6 nant’à a scala di Riechter hà toccu l’este di l’Afganistanu. Paesi sani sò strutti è ci sò stati per avà più di 2.200 morti è 3.600 feriti. Ma ci volerà cuntà di più vìttime chì sò centinaie di millaie di personi chì càmpanu per sti lochi induve a terra hà trimatu. Secondu à l’ONU, « ùn face dùbbitu chì stu bilanciu hà da cresce di manera espunenziale. A sfida hè di pruvà à ghjunghje sin’à ste zone rinculate chì e strade sò state dannighjate ». L’Afganistanu hè frà i paesi i più pòveri di a pianetta. L’aiutu umanitariu hè statu riduttu st’ùltimi anni è nimu ùn vole aiutà u regime talibanu.
À mezu à ssu drama tremendu, ci n’hè un antru mostruosu è insuppurtèvule. E lege islamiste talibane impedìscenu à l’omi d’entre in cuntattu cù donne ch’ùn sò micca di a so famiglia. Vale à dì chì i succorsi ùn si sò micca occupatu di e donne ferite o imprigiunate sott’à e petre. Nimu ùn hà aiutatu sse donne è sse zitelle insanguinate chì chjamàvanu aiutu. Sè un omu a si pruvava, era pigliatu à fucillate da i talibani… parechje sò morte cusì in u so sangue, i so lagni è i so pienti, cù tutti l’omi in giru fighjendu ssu spetàculu macabru. In certi paesi, quattru ghjornu dopu à a catastrofa ùn ci era ancu donne salvatrice per porghje aiutu à ste curciarelle ferite è prese sott’à carcinacci è ruine. U ministeru di a salute afganu hà avutu ancu u stòmacu di spiecà chì e donne duttore o infirmiere èranu mubilizate… In fatti, in 2024, una lege talibana interdisce à e donne di fà stùdii medicali. U colmu di l’assurdu di stu regime islamistu chì disprezza e donne à un puntu scemu : da quì à qualchi annu, ùn fermerà più ne duttore, ne infirmiere donne in Afganistanu. Nimu ùn puderà curale. Digià hè diffìciule oghje per una donna incinta, o malata di truvà aiutu. Allora, quand’ella accade una catastrofa ! L’omi cù un sadismu tremendu, pè i talibani, cù a paura in corpu, per l’altri omi, fièghjanu e donne soffre è more senza un gestu, senza una parulla. Mancu i cani ùn sò trattati cusì.
E donne chì si ne sò surtite sò dinù in perìculu, chì parechje anu persu u maritu, u babbu, u fratellu è ùn anu più omi di a famiglia. Sole, sò prede pè i terruristi chì ùn anu ancu finitu di marturiale. Màncanu infrastrutture sanitarie o di pruvista in acqua. È pè e donne o e zitelle ch’ùn sò a priurità, màncanu e latrine per un dettu. « In a vita cutidiana, in u cuntestu culturale, sse donne dèvenu digià luttà per sopravive è pruvede à i bisogni di i cinnini. Oghje, in u cumbugliu di e cunsequenze di ssu terramotu, averanu di più difficultà à truvà un locu sicuru da pudè dorme è dà à manghjà à i figlioli » dice l’ONU. U solu aiutu ch’elle ponu avè hè quellu di e donne umanitarie è di l’urganisazione ch’elle mèttenu in ballu da per elle per aiutassi trà donne.
Dice Chekeba Hachemi, un anziana diplomata afgana : « sti terruristi talibani strùghjenu tutta una generazione di donne è senza donne, un ghjornu, ùn fermerà più Afgani. Ghjè un òpera di genocidiu d’una pupulazione à traversu sse donne sott’à u sguardu di l’Occidente chì lascia fà ». •
