Arritti apre quì una nova rubrichella per ramentà u pueta Natale Rochiccioli, natu in u 1911 è spentu in u 2002 à l’età di 91 anni. Duttore di prufessione era un pueta di prima trinca, di ssi Corsi di stintu stuzzicaghjolu ch’ossèrvanu a vita è a fàcenu girà in burla da dacci à tempu belle lezziò astute ! Natale Rochiccioli era attaccatu à a lingua è à a cultura corsa, era un omu umanistu è generosu. Nativu di Carghjese induv’ellu riposa è induv’ellu hà datu u so nome à u Spaziu Culturale, stava in Aiacciu induv’ellu hà marcatu assai u mondu culturale da u tempu di u Riacquistu à l’annate Novanta. Hà scrittu mondu fole, burle, macagne è tan’altri scritti. Frà i quali, ste fàvule magnìfiche !
A cicala famita
Toccu i freti di Nuvembre, a Cicala sturdita,
Si truvò senza focu, arrighita è famita…
Pinsò chì la Furmìcula, carca di pruviste,
Si farìa un piacè di falli qualcosa arriste :
– O Cummà… Vurrìa fà a pulenda, ùn aghju più farina… Pristàtemine un pocu, ma… ch’ella sìa bella fina.
– Questa hè bella a passata… ùn ai più farina ?…
Quand’e cogliu a castagna, tù, balli a manfarina ?…
– Sì t’ùn ai farina, dammi un ficatellu…
Si t’ùn lu voli dà sanu, dàmmine un pizzatellu…
– Sì t’ai la fame, tirati dui salti.
Eiu travagliu par mè ùn travagliu par l’altri.
Datti qualcosa eiu ? Ùn ci hè paura !
Sì t’ùn franchi la porta, pigliu la spazzura…
Si n’andò la Cicala senza aspità lu restu.
Era ghjunta in fùria, scappò ancu più prestu…
Muralità
À chì ùn ne hà, ùn ne mangna…
Si tù voli a pulenda, vai à coglie a castagna ! •
