Arritti hà apertu quì a settimana scorsa una nova rubrichella per ramentà u pueta Natale Rochiccioli, natu in u 1911 è spentu in u 2002 à l’età di 91 anni. Duttore di prufessione era un pueta di prima trinca, di ssi Corsi di stintu stuzzicaghjolu ch’ossèrvanu a vita è a fàcenu girà in burla da dacci forse belle lezziò ! Natale Rochiccioli era attaccatu à a lingua è a cultura corsa, era un omu umanistu è generosu. Nativu di Carghjese induv’ellu riposa è induv’ellu hà datu u so nome à u Spaziu Culturale, stava in Aiacciu induv’ellu hà marcatu assai u mondu culturale da u tempu di u Riacquistu à l’annate novanta. Hà scrittu mondu fole, burle, macagne è tan’altri scritti. Frà i quali ste fàvule magnìfiche !
U pranzu di u lione
Lione avìa invitatu ogni animale à un gran’pranzu ginerale. Locu di riunione, a grotta di u Lione. Gran’puzzicheghju d’osse, resti di carne, ch’ellu avissi spazzatu, mancu à parlanne, trippe carche di mosche, carcazze di becchi, chì, figlioli cari, ci era da cascà secchi.
Quand’i l’Orsu s’affaccò in cappellu è guanti, firmò talmente seccu chì fece a cascata in davanti.
– O Madonna… cumu fate à stà mezu à stu puzzicheghju… Mi diciarete, a Rue Fesch hè ancu peghju… Sulamente…
Sulamente, ùn hà compiu a so dimustrazione, chì si hè fattu ammazzà da u Lione.
– A Rue Fesch !… avete intesu issa cumparazione ? O Scìmia… tù chì ai tutti i to sensi… di l’upinione di l’orsu chì ne pensi ?
– O Sgiò Liò, vi vulìa dispiace : à mè, st’adore d’Hortensià, mi piace.
– Hortensià… tù, ti futti di mè o guffò.
È li fece saltà u capu d’un scapizzò…
– O Vulpina… tù chì sè stata in Parigi, di l’affare di a Rue Fesch chì ne dici ?
– O Sgiò Liò, eiu ùn sente nè Rue Fesch nè calata*, nè Hortensià nè Mimomà, chì sò incatarrata…
Tappallusi in issu casu si chjama « avè » u nasu.
Muralità
U prifettu hè persuasu chì i nostri carrughji sò parfumati
Ùn sà micca chì tutti i merri sò incatarrati. •
* a calata : custruzzione in lu portu duv’elli accòstanu i battelli. In Aiacciu, a parolla hè turnata nome pròpiu di locu.
