Arritti hà apertu duie settimane fà una nova rubrichella in l’onore di u pueta Natale Rochiccioli, natu in u 1911 è spentu in u 2002 à l’età di 91 anni. Duttore di prufessione era un pueta di prima trinca, di ssi Corsi di stintu stuzzicaghjolu ch’ossèrvanu a vita da dacci forse belle lezziò ! Natale Rochiccioli era attaccatu à a lingua è a cultura corsa, era un omu umanistu è generosu. Nativu di Carghjese induv’ellu riposa è induv’ellu hà datu u so nome à u Spaziu Culturale, stava in Aiacciu. Hà marcatu assai u mondu culturale da u tempu di u Riacquistu à l’annate novanta. Hà scrittu mondu fole, burle, macagne è tan’altri scritti. Frà i quali ste fàvule magnìfiche !
A ranochja accant’à una vacca
Marc’Andrìa ind’è l’ortu si tinìa a vacca… Ci hè l’arba è a cummudità di l’acqua… Vi dite chì l’ortu duvìa esse postu è vangatu ? À Marc’Andrìa ùn l’interessa, vive da pinsiunatu…
Ma què ùn hè a quistione. Hè piuttostu in quellu chjosu duie ranochje in cunvarsazione :
– A vedi quella vacca cusì bella ? Voli scummette ch’eu diventu cum’è ella ?
– O Mà… falla finita cù a to brulla*… Si tù diventi cum’è una vacca ùn ti manca più nulla. Senza cuntà chì s’ella ti vede imbuffata, hè capace à sciaccatti una curnata…
– Lascia corre e to paure, tù stà quì, è pìglia e misure… Fuuuuh… Sò assai ingrassata ?
– A pena più chè una pumata…
– Fuuuuh… è avà ?… Fuuuuh… Dinò un colpu solu…
– Avà pari tutta Minìa quand’ella aspittava u cuppiolu… Ma arrèstati ch’è tù sìa binadetta, sinnò ai da cripà cum’è un pneu di bissicletta…
– Fuuuuh… Mi sentu strappà u fiatu…
U frombu chì vene di ròmpevi l’arechja, fù quellu di a ranochja chì era crechja…
È sapete, a vaccaccia, càusa di ssu stalvatu ? Ùn hà mancu vultatu u capu.
Muralità
Sì tutti i vanitosi cripàvanu à u listessu mumentu
Sarìa un veru bumbardamentu… •
* Brulla : metatesi di burla.
