Sta 34a ghjurnata di u campiunatu di Lega 2 hè stata una bella ghjurnata pè u mondu di u ghjocu à pallò isulanu ! L’ACA hà guadantu un puntu di più cù u so scontru à parità in Valenciennes… è s’avvicina à gran’passi di a Lega 1. Un evenimentu per l’Orsi ribelli è u futbollu corsu chì sunnieghja d’alzassi à i livelli i più alti. U Sporting hà rigalatu un maccione à u pòpulu turchinu è assicuratu u so mantenimentu in Lega 2 à trè ghjurnate di a fine. Hè un sullevu chì vale e più grande vittorie ! Cù a manera in più, è di pettu à una squadra di u top 5 di ssu campiunatu. Fendu cusì hà ancu resu serviziu à l’ACA. E squadre corse anu fattu onore torna à a Corsica quist’annu è ghjè una bella suddisfazzione per tutti.
Ma ssa ghjurnata era dinù quella di l’emuzione è a nustalgìa cù l’addìu à i micrò di RCFM di l’amicu Jean Pruneta. Piglia a so ritiratu u ghjurnalista spurtivu chì ci hà rigalatu tante stonde di passione scumpartute dapoi 38 anni à cummentà i scontri du u Sporting Club di Bastia. Oh quant’ellu ci hà da mancà ! U so ùltimu cummentu u ferà contr’à Rodez u 7 di maghju pròssimu, per l’ùltima ghjurnata di stu campiunatu, ma i sustenitori è i rispunsèvuli di i Socios è di u Club li anu resu un bellu umaggiu vènari u 22 d’aprile in Furiani ! Felicitazioni di a tribuna di stampa cù i so amichi di l’atri mèdia, videò nant’à i scrini di u stàdiu di i so cummenti frà i più famosi, maglietta offerta à u so nome, banderole in tribuna Petrignani, giru di u stàdiu sott’à e sciaccamanate… era un bellu mumentu è a si meritava !
O Ghjuvà ci hai tantu fattu campà sti scontri è l’emuzione di u pòpulu turchinu cù e to cacciate sceme, ùn ci ne scurderemu mai, da sta vittoria contr’à Lyon… « Ouais, ouais, ouais, ouaiiiiiiis !!! A vittooooria pè u Sporting di Bastia, chì mette stu casgiu frescu in fondu di u frigidaire, u casgiu cù i vermi secchi secchi »… È i to mughji di pettu à u PSG cù « Oooooh la volée, la pastille, le missile, le bombardement, l’extraordinaire tir de Julian Palmieri »… è qual’hè chì pò scurdassi di ssa meza finale di a coppa di a Lega in Monaco à i tiri aux buts… « Sébastien Squillaci, il a le stade de France au bout du pied, per piacè, Sébastien, pùrtaci in Parigi, j’y suis jamais allé »… Oh le rise è a fiertà ! O Ghjuvà, fermi per sempre a voce di u Sporting, tanti ringrazii à tè, è bona ritirata ! Camperemu di sicuru torna inseme belle stonde di vittòrie ! Forza o fratè ! •
