U situ Educorsica prupone parechji attrazzi à tutti quelli chì t’anu per scopu l’amparera di a lingua corsa, ch’ella si tratti di prufessori o di studienti chì cèrcanu à migliurà l’adopru di u corsu. Di fatti, truvarete, bella sicura, libri sculari à carcà, ma dinù ritratti, filmetti, soni, esercizzii in ligna, o cartulari pedagògichi. Queste e risorze, e pudete ottene di gràtisi : cuccagna !
Postu ch’ùn possu parlà di tuttu, parlaraghju di i libri.
I vezzi di Vulpucciu hè dedicatu à i più ghjòvani. Si tratta di a ghjurnata d’un zitellu in scola materna, ciò chì permette à quellu chì stà à sente a stòria, d’identificassi à u parsunaghju principale. Questu quì deve dà capu à i perìculi oghjinchi, è riesce à entre in cumunicazione cù à ghjente à l’intornu. Stu libru darà à i zitelli u vucabulariu ùtule per discrive i sfarenti mumenti di a so vita.
In quant’à i zitelli chì èntrenu in culleghju, u libru Ghjochi in dì li farà scopre l’universu di u teatru, di a mitulugia è di l’imaginariu. U fattu si stà chì sei fole sò state teatralizate. Scatulettu è a rotula di i venti, per esempiu, hè l’adattazione d’un contu corsu tradiziunale.
Pè i culleghjenti è i liceani, a nuvella, tracunnisciuta, di Mérimée, cioè Colomba, vene tradutta in corsu. Ma u libru lascia stà u testu uriginale da chì i sculari pòssanu fà u pass’è veni trà u versu uriginale è a traduzzione corsa. D’altronde, ghjunti à a fine, truveremu a stòria vera di Culomba è u so
cuntestu stòricu (a «Restauration »).
Educorsica prupone dinù una cullezzione di libri chì u sughjettu hè a vita isulana per via di ducumenti belli chè interessanti. Di fatti, «50 ducumenti » tratta d’una prublemàtica di u prugramma sculare, à pàrtesi di a vita vicina, reghjunale è isulana, messa in pruspettiva è situata ind’un cuntestu più largu. A prima òpara ch’o vurria ammintà hè «50 ducumenti pà e scenze di a vita è di a tarra in Còrsica ».
Hè detta chì, campendu ind’una ìsula chì a natura t’hè à pocu pressu rispettata o chì ci sò l’animali endèmichi, a scelta di u sughjettu di stu libru pare naturale. In giru à sei temàtiche, cum’è u celu è a tarra o l’energia, permette à i sculari di custruìscesi « una prima raprisintazione globale, raziunale è cuerente di u mondu duv’ellu campa u scularu. Ogni tema ghjova da custruisce cuncetti o nazione chì tròvanu a so appiicazione in l’educazione à u sviluppu durèvule ».
Infine, «50 ducumenti pà una cultura corsa » mette in ballu temàtiche spùtiche. U scopu hè di falla finita cù una cultura morta, girata verdi u passatu. Innò, questu u libru si vole a testimunianza d’una cultura viva è arradicata in u filu di i tempi.
Eccu dunque un situ riccu riccu, chì pò esse cunsultatu da tutti, qualsìasi u so livellu in corsu.
Marina Chovin.
