U cullettivu Féminicides par compagnons ou ex lotta contr’à u fragellu di sse donne, morte perch’elle sò donne. Anne-Cécile Mailfert, presidente di a Fundazione di e donne, era nant’à France Inter a settimana scorsa per pienghje a vintunèsima vìttima di l’annata 2023 è dinunzià u silenziu ch’ellu ci hè in giru à sta stirpera : « un silenziu di morta ». Oghje chì scrivu, ne simu à 23 second’à Féminicides par compagnons ou ex. « Cinque donne tombe solu a settimana di a San Valentinu è nisun rimore (…) ùn si conta più i feminicidii, allora ùn còntanu più » dice Anne-Cécile Mailfert. « I guverni tempurizèghjanu, i mèdia si smubilizèghjanu, è si sparghje torna un silenziu di morta. » « Ùn ci vole micca à scurdàssine. Ci vole à dì u so nome à u 20h, dì ch’elle còntanu, chè no e cuntemu. Cunnosce u so visu. Cunnosce e so vite. » U guvernu ùn dà micca ss’infurmazioni. U crìmine di feminicidiu ùn esiste micca in u Còdice penale. « Dapoi u 2016, u nostru cullettivu Féminicides par compagnons ou ex percorre u web da truvà artìculi di stampa chì tràttanu d’affari di feminicidii in u coppiu in Francia, da pudè fane un ricensu da sparghje nant’à i retali suciali è nant’à u nostru situ internet » spieca u cullettivu chì vole fà cunnosce sse donne, u so visu, a so stòria. Andateci puru (feminicides.fr) l’associu seguita dinù l’affari in ghjustizia, u so scopu hè « una presa di cuscenza mediàtica è sucietale, una reazzione di i puteri pùblichi cù a messa in ballu d’una pulìtica di dissuasione (appiechendu a lege) è l’educazione di l’omi rispunsèvuli di sse viulenze. In Francia, ma dinù in u mondu, una grande parte di l’assassinii di donne si fàcenu da un partenariu ìntimu o anzianu partenariu. U locu u più periculosu per una donna hè a so pròpia casa » spieca torna u cullettivu. U Statu ellu, categorizeghja mondu assassinii in crìmine passiunale. Senza riconnosce un prublema, ùn hè pussìbule di mette in ballu suluzioni efficace.
Allora, cumu sòrtesi di sta malamorte ? Arritti ne parla suvente ma ci volerebbe à parlanne di più. Ùn ci hè peghju chè l’indiferenza. Invece di sse publicità à longu di ghjurnata à a televisiò, passà una fottò cù duie righe è un nome, cum’ellu a face u situ di u cullettivu Féminicides par compagnons ou ex, da ùn scurdassi, da sensibilizà a ghjente, da fà nasce rivolta, da interpellà u Statu… sarebbe già una bona. E suluzioni si cunnòscenu, a prevenzione ind’è e famiglie, l’istituzioni, e strutture pedagògiche, a scola, da amparà à i zitelli ch’elli sò pari, machji o fèmine, è ch’elli si dèvenu rispettu è sulidarità. Prevenzione dinù ind’è a pulizza, da piglià à u sèriu e lagnanze, è da custruisce intornu à a donna ch’hà u curagiu di chjamali, un sistema di vera prutezzione, infurmendu sùbitu i precuratori, i servizii suciali, è da mette a pressione nant’à u rispunsèvule. Micca di lascià a donna sola di pettu à u so bòiu. A parulla à e vìttime, a deve dà ancu u tribunale, prutege a donna (è i zitelli) cù decisioni veradimente dissuasive è ripressive, da mette l’omi in surveglianza, da impòneli di curassi dinù. U rolu di e stituzioni suciale è di l’associi ch’accumpàgnanu e vìttime deve esse ricunnisciutu da falle sorte di a so priggiò.
Sò quasi mille donne chì sò state tombe dapoi a nàscita di stu cullettivu. L’ùltima si chjama Elisa. Hè stata tomba in Prunelli di u Fium’Orbu, ind’è noi, in Corsica. •
