Si vulìa festiva ssa prima edizione di a Currilingua, hè stata carca d’emuzione, testimugnanza è speranza.
Emuzione per ssa prima edizione, à corre nant’à i stessi passi chì i nostri amichi Baschi è Brittoni, di manera festiva da ch’ella campi a nostra lingua, da ch’omu sparghji fede è sulidarità, per arradicà ind’è l’avvene ssa manifestazione cù a nostra vulintà di vèdela campà è di tramandala à e nove generazioni. Éranu parechje centinaie da Borgu à Sulinzara !
Emuzione per l’urganisatori è i participanti, per vìa di u drama accadutu à a vigilia. Più ch’un amicu, un fratellu, Yann Pini, spendifocu, militente STC, militente di a nostra lingua s’hè spentu in orride circustanze, sprimendu un immensa suffrenza. Quelli chì u cunniscìani ùn avìanu u core à corre… eppò hè stata dumandata da a famiglia stessa postu ch’ellu s’era impegnatu ellu è i so figlioli per ssu mumentu di spartera in giru à a nostra lingua. L’ùltima tappa di a Currilingua, hè cresciuta torna l’emuzione cù l’entrata in Sulinzara, u so paese, in silenziu è rispettu, da rèndeli un umagiu degnu è fraternu. À i soi, cunduleanze afflitte. À tè, Yann, chè tù riposi in a pace chè t’hai circatu.
Testimugnanza di a fede è a vulintà di tutti, di accumpagnà, tramandà, sparghje, difende a nostra lingua, di a nostra forza per ghjùnghjeci dinù, inseme, à l’imàgine di ssu « testimognu » trasmessu da chilòmetru à chilòmetru, da U Borgu à Sulinzara. Bella simbòlica d’una corsa cum’una grande catena di fervore è di diterminazione ! Hè un messagiu da sparghje è chè no saremu di più in più numarosi à porghje ogni annu !
Speranza pè a nostra lingua è a nostra cultura, pè a ghjuventù chè no vulemu aiutà à piglià a rileva, per l’azzioni da sustene, da ch’ella campi è sbuccia a nostra lingua !
Tanti ringrazii à u Cullettivu Parlemu Corsu pè e so magnìfiche iniziative ! Tanti ringrazii dinù à tutti i participanti. Dèmuci a mane, cuntinuemu ssa grande è bella catena di u core è di l’ànima corsa, Longa vita à a Currilingua ! •
