Tutti s’èranu datu appuntamentu… ancu a gràndine, a piossa, a neve, u freddu… ma dinù millaie è millaie di Corsi ghjunti da tutti i rughjoni ! Cari, trenu, vitture, anu raghjuntu Aiacciu 15 000 à 20.000 personi da pudè fà sente a so voce è dì u so sustegnu à i presidenti di u Cunsigliu Esecutivu è di l’Assemblea di Corsica chì chjàmanu à Parigi à neguzià una suluzione pulìtica. À quelli chì dibàttenu di sapè sè no èramu più o menu di 20.000, pocu imprema !… a dimustrazione di ssu sustegnu hè stata fatta di manera franca è chjara. U pòpulu era in carrughju ssu 3 di ferraghju in Aiacciu. Quand’ellu serà stampatu ssu ghjurnale, si saperà ciò ch’ellu hà rispostu u presidente di a Repùblica. Aspettendu… eccu qualchi stampa di ssa bella ghjurnata di mossa pupulare.
