Erasmus hà 30 anni. Sò 5 millioni e personi ad avè prufittatu di ssu prugramma aurupeu, di sicuru u più bellu è pruduttivu di l’istituzioni aurupee. U scopu ? Fà move a ghjente, furmà a ghjuventù, prumove scambii trà ghjòvani aurupeani.
Erasmus permette à i studienti di fà una parte di i so studii ind’un antra università o una scola aurupea. Da trè mesi à un annu, i studii si fàcenu dunque à u stranieru, senza pacà di più è ancu cù una borsa cumunutaria ! Erasmus aiuta a creatività è i prugetti di mubilità è di cuuperazione in Auropa, sustene l’innuvazione, l’educazione, a furmazione, a cuuperazione…
I viaghji fòrmanu a ghjuventù dice l’adasgiu pupulare. Hè da ssu custatu sèculare ch’ellu hè natu ssu prugramma è da a vuluntà di rinfurzà a mubilità di a ghjente à u senu di u territoriu aurupeu. Ma Erasmus incuragisce dinù tutte l’età è tutti i livelli di furmazione. Avvicina i studienti è u mondu di l’impresa. È si face dinù trà paesi aurupei è paesi fora di l’Auropa.
Ssi scambii cundùcenu à fà cresce e cumpetenze in i duminii di a cunniscenza, l’educazione, a furmazione, a ricerca. Mudernisazione di e pràtiche di furmazione, innuvazione suciale, creazione di filiere nove, lea trà imprese è studienti, rinforzu di u travagliu cù e rete, riforma di a guvernanza di i prugramma aurupei, eccètera…
facce avanzà l’Auropa ! È a lea pò ci hè! Pare ch’elli sò nati un millione di ciucci da coppii chì si sò scuntrati in grazia à Erasmus ! Dapoi ch’ellu hè statu creatu u prugramma, si rinforza sta lea, tocca di più in più ghjente, s’allarga à temi novi.
À l’iniziu, u so scopu era di permette à i studiendi di parte un anu à l’infora per cuntinuà i so studii. Dapoi, hè cresciutu u prugramma, passendu da 11 à 33 paesi, s’indirizza dinù à i sculari, i cullegiani è i liceani, ghjòvani da i cursus clàssichi o da l’insignamentu prufessiunale.
Parte à u stranieru, imparà, scuntrà a ghjente, Erasmus hè un furmidèvule arnese per arrichìscesi da u scambiu è a sperienza. In fin’di contu, hè a più bella rièscita di l’Auropa. Oghje, a mubilità di i ghjòvani hè un’di i mezi di nutà a vitalità di un’università. I primi studienti à avè prufittatu di u prugramma sapìanu ch’elli èranu piunieri. Oghje dìcenu tutti chì ss’annate Erasmus sò state e più belle di i so studii. Ci hè una reta chì s’hè messa cusì in ballu trà studienti Erasmus, insignanti, famiglie chì accògliani, una specia di sulidarità chì permette di campà cum’un incantu ssi mesi passati à l’infora, in tutti i casi di dà pettu à e difficultà. Scopre a ghjente, scopre u paese, i so musei, a so stòria, a so cultura, a so lingua, Erasmus hè mezu di furmassi sanamente è bè, pè i studii ma dinù in a so vita d’omu è di donna. Forma à a citatinanzà aurupea. Hè a più bella testimugnanza di a realità è a forza di l’Auropa !
Fabiana Giovannini.
