Mondu a ghjente, attelli, edee, brame, impegnu… i Stati Generali di a lingua corsa urganizati da l’associu studientinu Cusì, sò stati una rièscita ! Eletti, associi, linguisti, militenti, persunalità da tutte e mamme ci èranu, è dibàttiti animati è custruttivi anu datu nàscita à decisioni cuncrete. A sèguita serà impurtante da pudè mette in ballu pulìtiche da vulenne più !
«U nostru scopu hè d’addunisce i Corsi impegnati di l’avvene di a nostra lingua, a so difesa è u so vulè campà. In ogni locu, ogni stonda, u Corsu deve avè a so piazza pè esse impiecatu in a sucetà. Simu messageri di a lingua » dìcenu u presidente di Cusì, Ghjuvan’Filippu Mattei è i so purtavoci Brandon Andreani è Francescu Guerrini.
Da felicitali per l’iniziativa è a brama ch’elli sprìmenu cù l’altri membri di u s’associu. A vuluntà ci hè di salvà a nostra lingua, basta à dà spazii di spressione è urdigni da pudè mette in ballu a dinàmica ch’omu abbisogna. Cusì si prupone d’adunisce e forze vive di a lingua da pudè «mantènela chì, per falla campà, ci tocca à praticalla ».
A scola ùn basta micca, u guvernu ùn ferà mai u travagliu à a nostra piazza, tandu ùn ci vole micca à aspettà e misure pulìtiche, ghjurìdiche o puru custituziunale, cum’è a cuufficialità, o amministrative è finanziarie, ancu s’ellu ci vole à cuntinuà à bàttesi… ci tocca dinù à spàrghjela da per noi, à tutti i livelli di a sucetà. Sforzi pè i prufessiunali di a lingua, prufessori è maestri da tutte e mamme ben intesa, sforzi per l’associi, ch’anu un putere d’animazione impurtantìssimu è ch’ellu ci vole à sustene, da e nostre presenze è da l’appoghju di l’istituzioni è e cullettività corse, sforzi dinù da ugnunu, in u so cutidianu, per parlà, scrive, leghje a lingua corsa ! «A lingua corsa ùn hè lingua di a pulìtica o lingua sacrata, mà a lingua di u pane è a lingua di tutti » dice torna Ghjuvan’Filippu Mattei. È cusì, sei attelli sò stati urganizati sàbatu u 9 di ferraghju da pudè mette in ballu azzioni in u cantu è a mùsica, in l’amparera, dentru ma dinù fora di scola, in i mèdia, nant’à internet è e rete suciale, in i cumerci, in u mondu artìsticu, in u mondu di u travagliu dinù, da l’agricultori à l’artisgiani è à l’imprese ! Fà i vucabularii, offre spazii induv’ellu si parla corsu, sparghje a lingua in u sport, in a stampa, in u cutidianu di a ghjente… travagliu pò ci hè da fà torna da chì a nostra lingua sìa « a lingua di a vita » ! Dèmuci voglia è forza cullettiva, Aiò !
Fabiana Giovannini.
