Sta dumenicata si sò stallate parechje squadre municipale elette u 15 di marzu scorsu. Mumenti à le volte stòrichi ! Cù parechje decine di cità o paesi, Femu a Corsica s’arradicheghja in i territorii di l’ìsula. Dopu à dui mesi di cunfinamentu, l’inseme di i Cunsiglii municipali anu elettu i so merri. Evviva !!!
Biguglia, Jean-Charles Giabiconi caccia à Sauveur Gandolfi-Sheit ! Hè mancatu pocu à Jean-Charles Giabiconi, militante Femu a Corsica, per esse elettu à l’Assemblea di Corsica di dicembre 2017 (era u seguente nant’à a lista).
Oghje, hè u novu merre di Biguglia ! Una prudezza quand’omu sà quant’ellu paria impussìbule da pudè caccià à Sauveur Gandolfi-Sheit sin’à avà. L’hà campata male, postu ch’ellu hà demissiunatu sùbitu dopu à u scrutinu, lachendu u so aghjuntu rege un interim diffìciule cù a crisa sanitaria è u cunfinamentu.
Cù determinazioni è brama di rispunsabilità, a lista di bigugliesi cundutta da Jean-Charles Giabiconi vole custruisce u rinnovu di a cità. A crisa sanitaria hà affucatu un pocu a bella vittoria di u 15 di marzu scorsu, puru u novu merre di Biguglia hè statu festighjatu ssa dumènica, in prisenza di Gilles Simeoni, presidente di u Cunsigliu Esecutivu di Corsica et di Jean- Félix Acquaviva, secretariu naziunale di u partitu Femu a Corsica.
Sciaccamanate è ventu in puppa à u novu merre di Biguglia !
Santa Maria di Lota, Guy Armanet dalli !
Nova è bella elezzione torna per Guy Armanet cù 69,28% di i voti. Un risultatu chì traduce un prugramma riccu à prugetti è belle rialisazioni.
Felicitazioni !
U Petrosu, Julien Paolini è François Martinetti ! Julien Paolini, cunsigliere territuriale Femu a Corsica, è François Martinetti, membre di l’Esecutivu di u partitu Femu a Corsica, anu prupostu un binomu à U Petrosu. Julien Paolini hè u novu merre di u paese, è François Martinetti piglierà a sèguita da quì à trè anni. Una bella cumplicità cù l’inseme di i so eletti, per amministrà a cumuna ! Evviva !
Marignana, u sgiò merre hè Matteu Ceccaldi ! Matteu Ceccaldi, membre di u Cunsigliu Naziunale Femu a Corsica, hè statu elettu merre di u paese, à capu à una squadra di donne è d’omi purtati da u s’amore pè u paese. Mathieu hè statu u prim’aghjuntu à longu à sei anni. Cunnosce u mistieru è ferà dunque un bon’merre cù ssa squadra nova empia di prugetti è voglia d’agisce. Forza !
In parechji altri lochi, evviva ! Cusì in mondu altri paesi è cità di Corsica, i militanti di Femu a Corsica, à fiancu à personi ghjunte da tutte e mamme, scrivèndusi in sustegnu à a lìnea di u Presidente di u Cunsigliu Esecutivu di Corsica, Gilles Simeoni, arradichèghjanu a dimarchja d’un paese da fà. Ch’elli sìanu ricundotti dopu à una mandatura di travagliu, o eletti novi, in Furiani, Santa Riparata di Balagna, Lozzi, Campi, Brandu, Santa Lucia di Moriani, Santa Lucia di Mercoriu, Cuttuli Curtichjatu… scrìvenu tutti un paisagiu pulìticu novu pè a Corsica.
Cusì dinù, a bella vittoria in Quercitellu di Paul Louis Giannecchini chì piglia a merrìa ind’un paese induve s’hè vutatu u più ! 96,61% di participazioni (in piena crisa di u coronavirus !), un puntu di megliu chè in 2014, è 57,01% di i voti u 15 di marzu scorsu : Paul Louis Giannechini hè un merre plebiscitatu ! In piazza per 6 anni da rinvivisce u paese !
Di sicuru dinù, ci tocca à seguità da vicinu ciò chì s’hà da passà ind’i paesi è cità induve un secondu giru hè statu chjamatu. Frà quesse, Bastia ben intesa ! Ne riveneremu à parlà.
Forza à tutti !
